FIDE буюу Дэлхийн шатрын холбооноос өөрийн тэргүүлэх тэмцээнүүдийн нэг болох шатрын 44 дэх олимпиадыг ОХУ-д зохион байгуулахгүй гэсэн шийдвэрээ өчигдөр зарлалаа. Дэлхийн 190 орчим орны баг хоёр долоо хоногийн турш өрсөлддөг дэлхийн шатрын олимпиад 7 дугаар сарын 26-наас 8 дугаар сарын 8-ны хооронд Москва хотод болох ёстой байв.

Нэмж дурдахад, биатлоны Дэлхийн цомыг жил бүр зохион байгуулдаг дэлхийн хэмжээний алдартай цана, уулын спортын төв болох Ханты-Мансийск хотод энэ жил хөгжлийн бэрхшээлтэй шатарчдын шатрын анхдугаар олимпиадыг зохион байгуулахаар тогтоод байсан билээ.

ОХУ-аас нүүлгэн шилжүүлж байгаа өөр нэг арга хэмжээ бол шатрын олимпиадын хажуугаар зохиогдох Дэлхийн шатрын холбооны 93 дугаар их хурал аж.

Өчигдөр буюу 2 дугаар сарын 25-ны баасан гарагт болсон ээлжит бус хуралдааны үеэр төлөвлөсөн бүх албан ёсны тэмцээнийг ОХУ-аас нүүлгэх шилжүүлэх шийдвэр гаргасан байна.

Дэлхийн шатрын холбооны одоогийн ерөнхийлөгч Аркадий Дворковичийн эхний бүрэн эрхийн хугацаа дуусч байгаа тул энэ жил Конгрессод сонгуулийн журмыг мөн оруулах ёстой. Дворкович уг албан тушаалд 2018 оны 9 дүгээр сард сонгогдсон.

Ташрамд дуулгахад, FIDE дээрх арга хэмжээнүүдийг зохион байгуулах улс болон хугацааг дахин төлөвлөхөөр аль хэдийн ажилдаа оржээ.