Шууд Chart

Монгол Улсын шигшээ баг эхний тоглолтдоо хожигдлоо

2022-06-09 09:38:06

 

Азийн хөлбөмбөгийн холбооны Азийн цомын эрхийн төлөө В хэсгийн тоглолтууд Улаанбаатар хотод явагдаж байна. Өчигдөр манай улсын шигшээ баг эхний тоглолтоо Палестинтай хийж, 85 дахь минутад 11 метрийн торгуулийн цохилтоос гоол алдаж харамсалтайгаар хожигдлоо.

Энэхүү тоглолтын гарааны бүрэлдэхүүнд О.Оюунбаатар, О.Мөнх-Оргил, П.Баярцэнгэл, Г.Билгүүн гэсэн дөрвөн хамгаалагч үүргээ сайтар гүйцэтгэхийн зэрэгцээ хаалгач Э.Мөнх-Эрдэнэ өрсөлдөгч багийн олон цохилтыг үгүй хийж байлаа.

Багийн ахлагч Х.Цэнд-Аюуш, Г.Бат-Оргил, М.Төгөлдөр, Б.Балжинням гэсэн залуу тоглогчидтой дундын шугамыг хариуцан хамгаалалт, довтолгоог дасгалжуулагчийн хүссэнээр тэнцвэржүүлж тоглосон юм.

Довтолгоонд Европт тоглодог мэргэжлийн хөлбөмбөгчин Г.Ганбаяр, шигшээ багийн төлөөх эхний тоглолтдоо оролцож буй Б.Намсрайтай хослон тоглолоо.

Түүнчлэн гарааны бүрэлдэхүүнд нэрлэгдсэн Б.Намсрайгаас гадна сэлгээгээр талбайд гарсан Х.Тайванхүү, П.Ууганбаяр, Ж.Цогт-Очир, Т.Дөлгөөн нар үндэсний шигшээ багийн төлөөх анхны тоглолтдоо оролцлоо.

Дэлхийн чансаа 86 байрын урд Палестинд түрүүлж гоол алдахгүй байх нь манай шигшээ багийн нэн тэргүүний зорилго байсан учраас хамгаалалтдаа түлхүү анхаарч тоглосон. Шигшээ багийнханы тактик амжилттай хэрэгжиж 82 минут 0:0-ээр тэнцэж явсан ч шүүгч эгзэгтэй мөчид торгуулийн цохилтыг эсрэг багт өглөө.

Португалын дээд лигт тоглодог Одай Дабба амжилттай гүйцэтгэж Палестиний шигшээ баг ус агаар мэт гурван оноог авлаа.

Манай шигшээ баг дараагийн тоглолтоо энэ сарын 11-ний 12:30 цагаас Филлипиний багтай хийнэ. Үзэгч хөгжөөн дэмжигч та бүхэн МХБХ-ны цэнгэлдэх хүрээлэнд хүрэлцэн ирж багаа дэмжээрэй.

Нийтэлсэн: У.Баярсайхан

Монгол Улсын шигшээ баг эхний тоглолтдоо хожигдлоо  
Үзсэн: 479 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй