УИХ-ын дарга Гомбожавын Занданшатар 2022 оны 9 дүгээр сарын 01-ний өдөр Анагаахын шинжлэх ухааны үндэсний их сургуулийн 80 дахь хичээлийн шинэ жилийн нээлтийн үйл ажиллагаанд оролцлоо.

Тус сургуульд 2022-2023 оны хичээлийн жилд сургалтын 27 хөтөлбөрөөр 2150 оюутан шинээр элссэн бөгөөд нийт 12510 оюутан суралцаж байна. Мөн гадаадын долоон орны 162 оюутан монгол хэлний сургалтад хамрагдаж байгаа бол хүний их эмч бэлтгэх англи хэлний сургалттай хөтөлбөрт Канад, БНСУ, Япон, Нидерланд, АНУ зэрэг өндөр хөгжилтэй улсын 17 оюутан суралцаж байгааг АШУҮИС-ийн захирал, Анагаах ухааны доктор, профессор Н.Хүрэлбаатар хэллээ.  

Хөдөлмөрийн гавьяаны улаан тугийн одонт АШУҮИС нь 1942 онд МУИС-ийн Хүн эмнэлгийн факультет нэртэйгээр үндэс сууриа тавьж, улмаар 1961 онд Анагаах ухааны дээд сургууль болон өргөжин хөгжиж ирсэн. Өнөөдрийн байдлаар 39 мэргэжлээр 56400 гаруй эмч, сувилагч, ажиллагсдыг эрүүл мэнд, боловсрол, шинжлэх ухааны салбарт бэлтгэн гаргажээ.

УИХ-ын дарга Г.Занданшатар тус сургуулийн шинээр элссэн болон нийт оюутнууд, эрдэмтэн багш нарт 2022-2023 оны хичээлийн шинэ жил, АШУҮИС-ийн 80 жилийн ойн баярын мэндчилгээг дэвшүүлээд эрүүл мэнд, боловсролын салбарын эрх зүйн шинэчлэлийн талаар танилцуулав.

Тэрбээр, “Их сургуулийн тогтвортой хөгжлийг хангахуйц боловсролын эрх зүйн цогц шинэчлэлийг Улсын Их Хурлаар хэлэлцэж байгаа бөгөөд Монгол Улсад судалгааны их сургууль, их сургуулийн эмнэлгийн тогтолцоог бий болгон хөгжүүлэх бодлого, үйл ажиллагааг төр засгаас бүхий л талаар дэмжин ажиллаж байна. Тухайлбал, Эрүүл мэндийн даатгалын санхүүжилтийн шинэчлэлийн эрх зүйн орчныг бүрдүүлж, эмнэлгүүд гүйцэтгэсэн тусламж үйлчилгээ бүрээрээ, оношилсон, эмчилсэн үйлчлүүлэгч бүрээр санхүүжилтээ авдаг шударга тогтолцоог бүрдүүлсэн. Ингэснээр эмнэлгийн тусламж үйлчилгээг чанартай сайн үзүүлж буй эмч, сувилагч, ажилтнуудын цалин хөлс нэмэгдэх боломж бүрдсэн.

Мөн эрүүл мэндийн салбарын хууль эрх зүйн шинэчлэлийн хүрээнд хууль, УИХ-ын бусад шийдвэрийн төсөл боловсруулах ажлын хэсэг 7 сарын өмнөөс байгуулагдан ажиллаж, Донорын тухай хуульд нэмэлт, өөрчлөлт оруулах тухай хуулийн төслийг хаврын чуулганаар өргөн мэдүүлж батлуулсан. Энэ намрын чуулганаар Цусны донорын тухай хуулийн төсөл, Эрхтэн, эд, эс шилжүүлэн суулгах тухай хуулийн төсөл, Нийгмийн эрүүл мэндийн тусламж үйлчилгээний тухай хуулийн төсөл болон холбогдох бусад хууль тогтоомжийн төслийг боловсруулан ажиллаж байна. Эрдэмтэн багш, оюутнууд та бүхэн өөрсдийн салбарын хууль тогтоомжийн төсөлд цахим хэлэлцүүлгийн D-Parliament талбараар дамжуулан саналаа ирүүлж, чанартай сайн хууль гаргахад хувь нэмрээ оруулахыг эрхэмлэн захъя” гэлээ.

УИХ-ын дарга Г.Занданшатар АШУҮИС олон улсын жишигт нийцсэн эрдэм шинжилгээний 4 хүрээлэн, төв байгуулж, их сургуулийн 4 эмнэлэг, 2 сувилалтай болж өргөжин, үйл ажиллагаагаараа үндэсний тэргүүлэх их сургууль болсон байна. АНУ-ын Жоржиа мужийн их сургуультай хамтарсан 2+4 хөтөлбөр хэрэгжүүлж, дэлхийн өндөр хөгжилтэй улсын иргэдийг хүний их эмч мэргэжлээр сургаж эхэлсэн нь дэлхийн эмч нарыг Монгол Улсад бэлтгэх шанг татсан бахархам амжилт гэдгийг онцлон тэмдэглэв.

Нээлтийн үйл ажиллагаанд Боловсрол, шинжлэх ухааны дэд сайд Г.Ганбаяр, ЭМЯ-ны Төрийн нарийн бичгийн дарга Ц.Эрдэмбилэг, Монгол Улсын Хөдөлмөрийн баатар, Анагаахын шинжлэх ухааны үндэсний их сургуулийн зөвлөх багш, Анагаах ухааны доктор, Ардын эмч Ж.Баасанхүү, Монгол Улсын гавьяат багш, Анагаах ухааны доктор, профессор, академич Г.Батбаатар болон тус сургуулиас төрөн гарсан эмч мэргэжилтнүүд, эрдэмтэн профессорууд, оюутны төлөөлөл оролцлоо гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.