Нүүрсний хулгайн эсрэг, шударга ёс шаардсан иргэдийн жагсаал энэ сарын 4-нд Сүхбаатарын талбайд эхэлсэн бөгөөд өнөөдөр ч үргэлжилж байна.

Нийслэлийн Засаг дарга Сүхбаатарын талбайд жагсаж буй иргэдэд Соёлын төв өргөө /СТӨ/-ний гурван өрөөг ашиглуулахаар болсныг өчигдөр нийслэлийн Засаг даргын Нийгмийн хөгжил, боловсрол, эрүүл мэндийн асуудал хариуцсан орлогч З.Төмөртөмөө мэдэгдсэн. Тодруулбал, “Хүйтний эрч чангарч буй энэ цаг үед СТӨ-ний нэг өрөөнд иргэдэд эрүүл мэндийн тусламж үйлчилгээ үзүүлэх бол, нэг өрөөнд цагдаагийн алба хаагч нар байрлаж, аюулгүй байдлыг нь хангана. Түүнчлэн жагсагчдад дулаацах, амрах зориулалтаар нэг өрөөг гаргаж, мөн СТӨ-ний ариун цэврийн өрөөг ашиглуулна” гэсэн юм.

Тэгвэл энэ талаар Соёлын төв өргөөний ажилтнуудаас өнөөдөр тодруулахад, “Сүхбаатарын талбайд хонож буй жагсагчдад хонох, амрах хэсэг нэг давхрын зааланд гаргасан. Мөн төв талбайд жагсаж буй иргэдийн штаб байрлах, жагсагчдад эрүүл мэндийн тусламж үйлчилгээ үзүүлэх эмч, эрүүл мэндийн байгууллагын ажилтнууд тоног төхөөрөмжөө байрлуулах, үзлэг эмчилгээ хийх, жагсагчдын болон СТӨ-ний аюулгүй байдлыг хангах цагдаагийн алба хаагч нар байрлах гэсэн гурван өрөө бэлтгэсэн. Жагсагчдыг болон эрүүл мэндийн байгууллагын эмч, ажилтнууд, цагдаагийн алба хаагчдыг хүлээн авахад бэлэн” гэв.