Өмнөд Солонгосын автомашин үйлдвэрлэлийн тэргүүлэгчдийн нэг "Hyundai Car"  компани шинэ загварын "Aslan" автомашинаа нийтэд танилцуулав. Тус компанийн "Hyundai Grandeur" болон "Hyundai Genesis" зэрэг загваруудаасаа олон талаараа давуу үзүүлэлттэй энэхүү автомашиныг бусад улс орнуудаас тус улсын дотоод зах зээлд нийлүүлэгддэг ижил төрлийн автомашинуудтай өрсөлдүүлэх, өөрийн бүтээгдэхүүний зах зээлийг хамгаалах зорилгоор бүтээсэн бөгөөд үнийн хувьд илүү хямд, харин техник үзүүлэлт, тав тух, тансаг байдлаараа яг адилхан байна гэж үйлдвэрлэгчид мэдэгдэж байна.

"Aslan" хэмээн хүчтэний нэрээр нэрлэгдсэн дизель хөдөлгүүртэй, нэг литр шатахуунаар 9.5 км зам туулах чадвартэй энэхүү загвар нь үнийн хувьд 40-45 сая воноор үнэлэгдэх аж. Тус автомашиныг ирэх он хүртэл зургаан мянга, 2015 онд 22 мянган ширхэгийг тус тус дотоодын зах зээл дээр худалдаалах төлөвлөгөөтэй байгаагаа "Hyundai Car"  компани зарлалаа.