Шууд Chart

Хүү нь 70 нас, та минь 100 нас хүрч байна /Захидал/

2015-03-16 10:25:14

“Ээждээ бичсэн захидал” Улсын уралдааны тэргүүн байр эзэлсэн захидал 

Сайн байна уу ээж ээ?

Хүү нь 70 нас хүрч, та минь 100 нас хүрч байна. Цагаан сараар тань дээрээ очиж золгож үнсүүлэхэд сайхан байсан. Би аав, ээжийгээ баярлуулна, жаргаана гэж омог бардам явлаа. Миний залууд та минь үр хүүхдүүд бидэндээ байгаа бүхнээ зөөсөөр өтөлж дээ. Ээж ээ 1950-иад онд бид нар жаахан ч байж, хоймороор зулаад унтдаг байж билээ. Хоолоо идчихээд ходоод цатгалан болохоор бие биенээ өдөж шуугилддагсан. Таны чанасан цай ямар сайхан амттай, гэдэс цатгалан байлгадаг байсан юм бэ?  Хачир чимэг нь шагайн чинээ тос, өөх, сүүл байсан биз дээ.

1960-аад онд аав та хоёр, одоо амьдралаа бод цэрэгт яв гээд барилгачин байхад дуудаад өвөл нь “Өрнөлт” нэгдлийнхээ малыг төллүүлж байсан. Хаврын тэнгэр гэнэт муухайрч  шуурч эхлэхэд "Нарийн" өгсөөд үхрээ гүйцэж явтал шуурга ширүүсч морины чих үзэгдээд, хонь төллүүлж байхад норсон нойтон дээлийн зах руу цас чихээд хүзүү, чих даараад би биш үхэр, морь намайг замчилж явсан. Ээжийнхээ зааж өгсөн тарнийг уншаад явахад үхэр, морь саадгүй яваад Пүрэвням ахынд унтаж байхад аав минь өглөө орж ирээд юу ч дуугарахгүй сууж билээ. Хөөрхий дөө, аав минь. Харин ээж та минь гэрийнхээ наад хамар дээр сонин шатааж, сонингоо дуусгачихаад хуучин хувцсаа шатааж гэрэл гарган өөрөө осгох шахсан байж билээ. Аав, ээжийнхээ намайг хайрласан хайрыг улам бүр мэдэрсэн. Энэ мэт зүйлийг бичин суувал олон дурсамж бий.

Ээж ээ, амьд явбал алтан аяганаас ус ууна гэдэг дээ. Алтан дотортой модон аяга байхыг би дэлгүүрээс харсан. Тань дээрээ авч очно оо. Хүү нь танд цай хийж өгнө. Ээждээ тус хүргэж чадаагүй, ачийг тань хариулж чадаагүй ч чихийг тань халууцуулаагүй дээ баяртай байна.

Ээж: Цэрэндуламдаа
Хүү: Чойдогсүрэнгээс


Хүү нь 70 нас, та минь 100 нас хүрч байна /Захидал/  
Үзсэн: 4234 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
103.26.194.xxx [103.26.194.xxx] 2015-03-20 21:36
хэхэхэ энэ тэмцээн утгаа алдлааа
202.70.38.xxx [202.70.38.xxx] 2015-03-18 12:54
энгийн бөгөөд сэтгэлийн үг
182.160.44.xxx [182.160.44.xxx] 2015-03-16 21:09
мянга мянган жилээр өртөөлөн, хүмүүний үе үеийг уламжлан дамжиж өнөө бидний үед ирсэн малчин монголчуудын эгэл сайхан амьдралыг маш энгийн, элдэв хээнцэрлэл, гангараа, гайхуулах зүйлгүйгээр, тод томруун бичсэн нь үнэхээр гайхамшигтай... шуурганаар малд явсан хүүдээ санаа зовж араас нь эрэлд гарсан аавын, хүүгээ амьд буйг хараад тайвшрах сэтгэл, хүйтэн, шуургатайг ч үл хайхран юм шатааж хүүдээ гэрэл гарган өөрөө осгох шахсан эхийн хайрыг энгийн үгээр илэрхийлсэн нь үнэхээр гайхамшигтай... энэ захидалд өнөө цагийн өнгө дагуугаар аав, ээжийг тус тусад нь магтан дуулах бус, харин хоёуланг нь хүүгээ гэсэн сэтгэлээрээ нэгдэж, нэгэн зорилгоор хэн юу хийж чадаж байна түүгээрээ хүүдээ хэрхэн тусалж байгааг бичсэн нь үнэхээр агуу юм... гэр бүл гэдэг ганцхан аав биш, ганцхан ээж биш, гэр бүл бол аав, ээж, хүүхдүүдээс бүрдэх нэгэн халуун амь, цөм, эс, тэдний хоорондын дулаан харилцаа юм гэдгийг энэ захиаг уншсан хүн болгон ойлгох байх даа...
82.145.208.xxx [82.145.208.xxx] 2015-03-16 19:29
Iim zahia turuulj bgamu? Shuugch narinh ni nud chuham nuh bolchihsimu yasin?

Бидэнтэй нэгдээрэй