Төв аймгийн Эрдэнэсант сумд ажиллах үеэр УИХ-ын гишүүн С.Батболд шинээр ашиглалтад орсон сурагчдын дотуур байрны нээлтэд оролцож, сургуулийн захиргаа болон нийт сурагчдад ажил хөдөлмөрийн болоод сурлагын өндөр амжилт хүсэв. Мөн тэрбээр бусад бүтээн байгуулалттай танилцахын зэрэгцээ тус сумын засаг захиргаа, газар тариалан эрхэлдэг аж ахуйн нэгжүүдийн удирдлагуудтай уулзаж тус сумын ургац хураалтын өнөөгийн байдал, өвөлжилтийн бэлтгэл ажлын талаар мэдээлэл сонсов.

 

 

УИХ-ын БОХХААБХ-ны дарга С.Батболдоор ахлуулсан Ажлын хэсгийн бүрэлдэхүүн Угтаалцайдам сумд ажилласны дараа Цээл сумын хадлан, үр тарианы хураалтын явцтай танилцах үеэр УИХ-ын гишүүн, Хүнс, хөдөө аж ахуйн сайд Р.Бурмаа, Цээл сумын Засаг дарга М.Ганбат болон албаны бусад хүмүүстэй уулзлаа. Энэ жил гантай байсан төдийгүй төвийн бүсийн буудайн болон хүнсний ногооны ургац хураалт төлөвлөлт хэмжээнээс доогуур байгаа тул цаашид авах арга хэмжээний талаар санал солилцлоо.

 

 

УИХ-ын БОХХААБХ-ны дарга С.Батболд Төв аймгийн Борнуур сумд ажиллах үеэр ургац хураалтын явц, цаг үеийн байдлын талаар мэдээлэл хийв. Тэрбээр энэ жилийн ургац хураалтын байдал цаг агаарын тааламжгүй нөхцөлөөс хамааран аймаг, сумдад харилцан адилгүй байгаа тухай мэдээлэл гарч буй тул Улсын Их Хурлын Байгаль орчин, хүнс, хөдөө аж ахуйн байнгын хороо Хүнс, хөдөө аж ахуйн яамтай хамтран Төв аймгийн зарим сумдад ургац хураалтын байдалтай танилцаж байна. Энэ жилийн үр тарианы болц, гарцын байдал харилцан адилгүй байгаа тул үтрэмийн ажил удаашрах хандлагатай байгаа хэдий ч орон нутгийн тариаланчид 50 хувиас доошгүй ургац авахаар ажиллаж байна гэв. Үүнд цаг агаарын тааламжгүй байдал нөлөөлсөн тул төр, засгийн зүгээс ямар арга хэмжээ авах талаар үзэх шаардлагатай гээд газар дээр нь ажиллаж байна. Харин төмс, хүнсний ногооны ургацын хувьд Төв аймгийн хэмжээгээр сайн байгаа төдийгүй дунджаар га тутмаас 200 орчим цт авч байна гэлээ.