Өнгөрсөн сарын сүүлээр Энэтхэгийн Гадаад хэргийн яамнаас Энэтхэгийн Ерөнхий сайд Нарендра Моди 12 дугаар сарын 24-25-ны хооронд Москвад айлчлахаар төлөвлөж байгаа тухай мэдээлсэн юм. Ерөнхий сайд Нарендра Модигийн Москвад хийх айлчлалын үеэр Энэтхэг улс ОХУ-аас долоон тэрбум америк долларын өртөг бүхий зэр зэвсэг худалдан авах гэж байгаа тухай Оросын хэвлэлүүд мэдээлж байна.

ОХУ болон Энэтхэгийн цэрэг техникийн салбарт байгуулсан гэрээний үр дүнг Модигийн айлчлалын үеэр гаргах гэж байгаа талаар Оросын Коммерсант сонинд ч мөн мэдээлжээ.  Зэр зэвсэг худалдаалах гэрээний нийт өртөг долоон тэрбум америк доллар байхаар тооцоолж буй юм байна. Ерөнхий сайд Модигийн Москвад хийх айлчлалын үеэр Орос, Энэтхэг "Ка-226Ти" загварын нисдэг тэрэг хамтран үйлдвэрлэх тухай гэрээнд гарын үсэг зурж магадгүй байна.

Мөн Энэтхэгийн зэвсэг худалдан авах хороо ОХУ-ын стратегийн зэвсэг "Эс-400" пуужингаас эсэргүүцэн хамгаалах систем таван ширхэгийг худалдан авахаар 5.8 тэрбум америк долларыг баталсан тухай Энэтхэгийн дипломат эх сурвалж мэдээлжээ. Орос, Энэтхэг нь 1960 оноос хойш хоёр талдаа ашигтай стратегийн харилцаа ялангуяа батлан хамгаалах цэрэг армийн хамтын ажиллагааны салбарт харилцаа хамтын ажиллагаагаа хөгжүүлж байна.

ОХУ нь Энэтхэгийн зэвсэг хамгийн гол нийлүүлэгч орон. Энэтхэгийн арми, агаарын хүчин болон тэнгисийн цэргийн зэвсэг техникийн гуравны хоёр нь хуучин ЗХУ болон ОХУ-д үйлдвэрлэгдсэн зэр зэвсэг байдаг юм байна.