Манай улсын археологийн салбарын судлаач, эрдэмтэд өнгөрсөн онд 100 орчим дурсгал малтан судалж, мянга гаруй олдворыг шинээр илрүүлсэн байна. Чулуун зэвсгийн бууц суурин, хүрэл зэвсгийн булш оршуулгын дурсгал, буган хөшөө, 13-14 дүгээр зууны хот суурины судалгаа зэрэг олон чиглэлээр Монголын төдийгүй Олон улсын хэмжээнд түүхэнд шинэ хуудас нэмэх олдвор дурсгалыг илрүүлж, судалгаа шинжилгээ хийсэн тухайгаа тэд өнөөдөр танилцууллаа. 

Хэнтий аймгийн Дэлгэрхаан сумын нутагт байдаг Чингис хааны анхны нийслэл "Аваргын балгас"-нд төмөрлөг үйлдвэрлэлийн дархны зуух нээн олсон байна. Мөн урьд өмнө судлагдаагүй байсан эртний Сяньби нарын бүтэн оршуулгын газрыг Баян-Өлгий аймгийн нутагт малтсан нь томоохон нээлт болжээ. Тамирын Улаан хошууны булшнаас Хүннүгийн шавар ваар савны урлалын олдворуудыг илрүүлсэн гээд эртний соёл иргэншлийн түүхэнд шинэ хуудас бичих нээлтийн жил байсныг ШУА-ийн Түүх Археологийн хүрээлэнгийн Археологи судлалын төвийн ЭШ-ний ажилтан А.Энхтөр онцолж байна. 

2015 онд манай археологийн салбарын судлаач, эрдэмтэд гадаадын есөн улстай хамтарсан 30 орчим төслийг хэрэгжүүлжээ. Тухайлбал, үндэсний түүхийн музейн судлаачид Хүннүгийн 92 булш шинээр тавьжээ.

Соёлын өвийг хамгаалах тухай хуулийг хэрэгжүүлэх хүрээнд мөн өнгөрсөн жил 55 ашигт малтмалын тусгай зөвшөөрлийн талбай болон шинээр тавигдаж байгаа авто замын трасс дагуу 20 сумын нутагт хайгуул малтлагын ажил явуулж 2600 орчим дурсгал шинээр илрүүлэн олсон байна. Энэ жил судлаач эрдэмтэд 11 аймгийн 16 суманд судалгаа малтлага хийхээр төлөвлөж байна.