Шууд Chart

Дулаан алдагдлыг бууруулахад үндэсний үйлдвэрлэгчдийг дэмжинэ

2016-02-18 14:33:10

Улаанбаатар хотод 1965-2000 онд барьж ашиглалтад орсон 1600 гаруй орон сууц байгаа бөгөөд эдгээр орон сууцууд ашиглалтад ороод удсан учраас хана, шал, таазны зай завсраар дулаанаа алдаж, дулааны хувийн алдагдал норматив хэмжээнээс 35-40 хувиар нэмэгдсэн байна. Дулааны алдагдал ихтэй байх нь эрчим хүчний хэрэглээг тэр хэрээр нэмдэг учраас орон сууцны дулаан алдагдлыг бууруулах зорилгоор дулаалгын шинэ технологийг нэвтрүүлэх ажлыг  нийслэлээс 2013 оноос эхлэн үе шаттайгаар эхлүүлсэн. Өнөөдөр нийслэлийн Засаг дарга бөгөөд Улаанбаатар хотын Захирагч Э.Бат-Үүл Баянгол дүүргийн 10-р хороололд байрлах хуучны угсармал орон сууцыг дулаалсан технологитой танилцлаа.
 
Тус орон сууц 40 жилийн өмнө ашиглалтад орсон, дулаан алдагдал маш ихтэй, хэвийн хэмжээнд дулаанаар хангаж байгаа ч “байр хүйтэн байна” гэсэн гомдол оршин суугчдаас тасардаггүй байжээ.  Харин өнгөрсөн жил “Баярс констракшн” компани тус орон сууцын нэг талыг өөрийн хөрөнгөөр дулаалсан байна. Ингэснээр дулаан алдагдал 20 орчим хувиар буурч, айлуудын дулаан 7-10 хэмээр нэмэгджээ.
 
“Баярс констаркшн”- компаний удирдлагын танилцуулж байгаагаар  европын орнуудын байшин дулаалгад өргөн хэрэглэгддэг  перлитээр энэхүү орон сууцыг дулаалсан бөгөөд уламжлалт хөөсөнцөрийн хэрэглээг бүрэн халсан. Перлитийг галт уулын чулуулнаас гаргаж авдаг тул өндөр чанартай, галт тэсвэртэй байдаг гэдгийг онцолж байлаа.

Нийслэлийн засаг дарга, “Улаанбаатар хотод дулаалах шаардлагатай байгаа орон сууцуудыг яг ийм технологиор дулаалж чадвал хотын сүлжээнд маш их хэмжээний  дулааны нөөц гарах боломжтой болно.Хамгийн гол нь иргэдийн орон сууц үнэ цэнэтэй хэвээр байна гэсэн үг юм. Үндэсний үйлдвэрлэгчид өөрсдөө дулаалгын материал гарган авч амжилттай нэвтрүүлсэн байгааг харахад сайхан байна. Бид эдгээр үйлдвэрлэгчдийг дэмжин хамтран ажиллах болно” гэсэн юм.


Дулаан алдагдлыг бууруулахад үндэсний үйлдвэрлэгчдийг дэмжинэ   
Үзсэн: 414 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй