Сэлэнгэ аймагт 2011 оны байдлаар 169 гол горхи тоологдож байснаас өнөөдөр 26 нь ширгэсэн байна. Байгаль цаг агаарын өөрчлөлтөөс илүүтэй хүний буруутай үйл ажиллагаа, ялангуяа уул уурхайн замбараагүй олборлолтоос болж гол горхи бохирдож ширгэх аюул нүүрлэж байгааг Монгол орны ойн сангийн багагүй хувийг эзэлдэг нутагтай Хүдэр сумын иргэд хэлж байна.

Сэлэнгэ аймгийн Хүдэр сумын Хүдрийн гол, түүнд цутгадаг Амж, Цагаан зүр, Хэрц, Шоргоолж, Зэлт, Хат зэрэг голууд Цагаан зүр голын эх нуурын тагтад алт олборлох үйл ажиллагааг хүч түрэн явуулсны улмаас өнөөдөр голын ус ихээр бохирджээ. Хүдэр голын сав дагуу өнөөдөр найман аж ахуйн нэгж, 20 орчим гар аргаар алт олборлогчид олборлолт хийн бохирдсон усаа шууд гол руу нийлүүлж байгаагаас чулуу нь харагддаг тунгалаг устай гол бохир шавраар урсч голын голдрил өөрчлөгджээ.

Өнгөрсөн хугацаанд сумын иргэдийн гомдлын дагуу хууль хяналтын байгууллага, аймгийн МХГазраас удаа дараа хяналт шалгалт хийж хууль бусаар алт олборлож байгаа иргэдийн үйл ажиллагааг зогсоодог ч эргээд ажиллаад эхэлдэг байна.

Хүдэр сумын 3000 гаруй иргэдийн амьдрал ахуйдаа хэрэглэж тариа ногоогоо усалдаг Хүдэр гол алтны уурхайнуудын балгаар бохирдож хус жодоо, гацуур бүхий ойн сан сүйдэж байгаль орчны тэнцвэрт байдал алдагдахад хүрээд байгааг нутгийн иргэд хэлж байна. Энэ талаарх дэлгэрэнгүй мэдээллийг "Монголын мэдээ" сувгийн мэдээллийн хөтөлбөрөөс үзээрэй.