Засгийн газрын “Ажилтай, орлоготой Монгол хүн” үндэсний хөтөлбөрийн хүрээнд Хөдөлмөрийн яам Монголын залуучуудын холбоотой хамтран “Ажилтай, орлоготой Монгол залуу” хөтөлбөр хэрэгжүүлж байгаа. Ажлаа дүгнэж өнөөдөр Төрийн ордонд чуулга уулзалт зохион байгууллаа.

Хөтөлбөрийн хүрээнд “Сумын залуус” , “Ажлын гараа” , “Цагийн ажил” төслүүдийг өнгөрсөн долдугаар сарын 1-нээс хоёр сарын турш 21 аймаг, 331 суманд хэрэгжүүлж, 3000 гаруй залуусыг ажлын байраар ханган орлоготой болголоо гэж Хөдөлмөрийн сайд Я.Санжмятав хэллээ.

Ерөнхий сайд Н.Алтанхуяг чуулга уулзалтад оролцож буй оюутан, залуучуудад баяр хүргээд ном эрдэм сурахынхаа зэрэгцээ хөдөлмөрийн амтыг мэдрэх нь чухал. Орон нутагт, сумдад баг болж ажилласан залуус шинэчлэл хийж чаджээ. Энэ хөтөлбөрийг Засгийн газар дэмжиж үргэжлүүлнэ гэлээ. Мөн Хөдөлмөрийн яам, Монголын залуучуудын холбоо хамтран оюутнуудыг цагийн ажил хийхэд туслаж, дэмжлэг үзүүлэхийг зөвлөлөө.

331 сумдад хүрч ажилласан багуудын ажлын тайланг энэ үеэр сонсож, бусдыгаа манлайлан ажилласан шилдэг багуудийг шалгаруулж, шагнал гардууллаа.