Саяхнаас  цахим мөнгөний хулгай, дээрэм, тонуул  зэрэг гэмт хэргүүд гарч эхэлсэн. Энэ тухай ЦЕГ-ын хэвлэл, мэдээллийн төвийн дарга, дэд хурандаа Б.Баатархүүгээс тодруулага авахад “Сүүлийн үед цахим орчинд  гэмт хэрэг маш ихээр үйлдэгдэж байна. Энэ хэрэг  цахим орчинд үйлдэгддэг. Мэдээж энэ нь тус тусдаа ойлголт юм. Эрүүгийн хуулийн 26 дугаар бүлэгт цахим гэмт хэрэг гэж юу вэ гэдгийг маш тодорхой зааж өгсөн байдаг.

Тодруулбал, тухайн байгууллага болон хувь хүний  мэдээллийн аюулгүй байдалд хууль бусаар халдах, мэдээллийн сүлжээнд хууль бусаар нэвтрэх, хортой программ бүтээж түүнийгээ тараах, захидлын нууцад халдах зэргийг цахим гэмт хэрэг гэж үздэг. Харин цахим орчинд үйлдэгдэж байгаа гэмт хэрэг бол цахим орчинг ашиглаж хүнийг гүтгэх, доромжлох, гэмт хэрэгт өдөөн турхирна.

Садар самууныг сурталчилна, оюуны өмчийг хулгайлна, бусдыг залилан мэхэлнэ. Далайлган сүрдүүлж, заналхийлэхийг хэлж байгаа юм. Гэмт хэргийн хэлбэрүүд цахим орчин руу шилжчихсэн гэж болно. Тэгвэл сүүлийн үед фэйсбүүкээр ихээр гарч буй залилангийн хэргүүдийн этгээдүүдийг шалгаж байна” гэв.