Дархан-Уул аймгийн Дархан сумын арванхоёрдугаар багийн нутаг дэвсгэрт 2016 онд улсын төсвийн хөрөнгө оруулалтаар 100 хүүхдийг хүлээн авах хүчин чадалтай 24 дүгээр цэцэрлэг ашиглалтад орсон билээ.

Тус цэцэрлэг хэдийгээр 100 хүүхдийн хүчин чадалтай ч энэ хичээлийн жилд дөрвөн бүлгийн 150 хүүхдэд сургуулийн өмнөх боловсролыг 20 багш, ажилчинаар дамжуулан олгож байна.

Хүүхдэд ээлтэй цэцэрлэг болох алсын хараатай ажиллаж байгаа тус цэцэрлэг өнгөрсөн оны арванхоёрдугаар сард үүдний өргөтгөлийг хийж, хүүхэд багачуудын ая тухтай орчинг нэмэгдүүлжээ.

Тус аймгийн засаг дарга С.Насанбат өчигдөр тус цэцэрлэгийн үйл ажиллагаатай танилцхад үүдний өргөтгөлийг орон нутгийн хөгжлийн сангийн 9.8, Боловсрол соёл урлагийн газрын урсгал зардлаас таван сая төгрөгөөр хийж нөөц бололцоогоо дайчлан дотоод тохижилтоо хийснээ дуулгав.

Энэхүү цэцэрлэгт сургуулийн өмнөх боловсролыг эзэмшиж байгаа нийт хүүхдийн 70 хувь нь Дархан сумын 15 дугаар багийнх аж. Иймээс цэцэрлэгийн хамт олон эцэг эхчүүдтэй нь уулзалт хийж, шаардлагатай ажлаа эрэмбэлсэн бөгөөд хаанаас нь харсан ч тохижилт сайтай, ая тухтай тавлаг орчинг бүрдүүлж чадсан байна.

 Тэд энэ онд камержуулалтын асуудлаа хамтдаа шийдвэрлэх гэнэ.