АНУ-ын Калифорни мужийн Лос-Анжелесийн тойргийн прокурорын газраас нэрт жүжигчин Стивен Сигалыг эмэгтэйчүүдэд бэлгийн дарамт учруулсан гэх хэрэгт шалгаж эхэлжээ. Лос-Анжелесийн цагдаагийн удирдах газар энэ хэргийг прокурорт шилжүүлсэн аж. Нэрт жүжигчнийг бэлгийн дарамт үзүүлсэн хэрэгт буруутгаж, 10 гаруй эмэгтэй  цагдаад хандаж гомдол гаргасан байна.

Хамгийн эхэнд Регина Симонс гэгч эмэгтэй Сигалыг хүчирхийлэл, бэлгийн дарамт үзүүлсэн хэмээн буруутгаж, өнгөрсөн онд цагдаад хандаж байжээ. Өнгөрсөн 6-ны өдөр ОХУ-ын гадаад хэргийн яамны Орос-Америкийн хүмүүнлэгийн  харилцааны асуудал эрхэлсэн тусгай элч төлөөлөгчөөр томилсон. Гэвч түүнийг тойрсон энэ шуугиан Америкт сүүлийн хэдэн сарын туршид үргэлжилж байгаа юм. Энэ нь АНУ дахь соёл урлаг, нийгэм, залуучууд солилцооны салбарт  Орос-Америкийн харилцааг  хөгжүүлэх Стивен Сигалын гүйцэтгэх үүрэгт нь сөргөөр нөлөөлж болзошгүй гэж шинжээчид тэмдэглэж байна.

Мөн Лос-Анжелесийн прокурорын газарт нэрт продюссер Харви Вайнштейн, жүжигчин Энтони Андерсон нартай холбоотой шинээр ирсэн гомдлуудыг шалгаж эхэлсэн байна. Өнгөрсөн оны 10 дугаар сард Нью-Йорк таймсынхан продюссер Вайнштейн сүүлийн 30 жилийн туршид хамтран ажиллаж байсан эмэгтэйчүүддээ, түүний дотор нэртэй жүжигчдэд бэлгийн дарамт үзүүлж ирсэн тухай материалыг нийтэлсэн юм. Түүнээс хойш бэлгийн дарамтын эсрэг эмэгтэйчүүд нэгдэж хөдөлгөөн өрнүүлснийг "Time" сэтгүүл өнгөрсөн оны онцлох үйл явдлаар нэрлэж байсан билээ.