ОХУ-ын нийслэл Москва хотын “Шереметьево” нисэх онгоцны буудалд гарсан “Сухой Супержет 100” онгоцны ослын урьдчилсан тайлан ирэх сарын 5-нд бэлэн болно гэж Улс хоорондын агаарын тээврийн хорооны ахлах шинжээч Владимир Кофман мэдэгдлээ.

Осол “хүчтэй газардсанаас үүдэлтэй” гэдэг нь тодорхой болсон тухай шинжээч тэмдэглэсэн байна. Шинжээчийн хэлсэн энэ мэдэгдлийг “Аэрофлот” агаарын тээврийн компани “Олон нийтийн, тэр дундаа мөрдлөг шалгалтад оролцсон хүмүүсийн санаа бодлыг эргүүлэх гэсэн оролдлого” гэж хүлээн авч байна.

Москвагаас Мурманск руу нисэх гэж байсан “Аэрофлот” компанийн “Сухой Супержет 100” онгоц энэ сарын 5-нд ниссэнээсээ хойш 28 минутын дараа ослын буулт хийсэн байдаг. Онгоц хүчтэй газардсанаас болж дугуй нь хугаран түлшний сав нь хагарч, гал гарсан юм. Энэ ослын улмаас онгоцонд байсан 78 хүний 41 нь амиа алдсан билээ.