Монгол Улсын Засгийн газар 2020 оны гуравдугаар сард ээлжит хуралдаанаараа “Монгол бичгийн үндэсний хөтөлбөр III”-ыг хэлэлцэн баталсан. “Монгол бичгийн үндэсний хөтөлбөр-III”-ын зорилго нь Монгол хэлний тухай хуульд зааснаар 2025 оноос төрийн албан хэргийг кирилл болон үндэсний монгол бичгээр хөтлөн явуулах, цаашид бүх нийтээр монгол бичигт шилжих бэлтгэлийг бүрэн хангахад орших юм.

Монголын үндэсний олон нийтийн радио, телевизээс 2025 оноос монголчууд хос бичигтэн болохтой холбогдуулан төрийн болон хувийн албан байгууллагуудыг монгол бичгээр хаяг бичвэрээ солиход уриалах, монгол бичгээ түгээн дэлгэрүүлж буй эрхмүүдийг алдаршуулах зорилгоор “Үндэсний бичигтэн монголчууд” аяныг эхлүүллээ. Мөн “Үндэсний бичигтэн монголчууд” гэгээн давлагаанд UBS телевиз, “Өдрийн сонин”-ыг нэгдэхийг уриалсан. Түүнчлэн “Үндэсний бичигтэн монголчууд” давлагаанд Улсын драмын эрдмийн театр нэгдэж, Дуурь, бүжгийн эрдмийн театрыг, Монгол Улсын үндэсний номын сан нэгдэж, Монголын үндэсний музей, Ховд аймгийн нийтийн номын сан, Сүхбаатар аймгийн нийтийн номын санг, “Талх чихэр” компани нэгдэж “Голомт” банкийг нэгдэхийг уриаллаа.

Монгол соёлын үнэт өв үндэсний монгол бичгээ хэрэглээ болгоё.