Шүүхийн сургалт, судалгаа, мэдээллийн хүрээлэн Ханнс-Зайделийн сан, МУИС-ийн Үндсэн хуулийн эрх зүйн хүрээлэнтэй хамтран “Байгаль орчныг хамгаалахтай холбоотой хэрэг, маргааныг шүүхэд хянан шийдвэрлэж буй байдал, дүн шинжилгээ, анхаарах асуудал” сэдэвт дотоодын эрдэм шинжилгээний хурлыг зохион байгуулж байна.

Хуралд Эрүүгийн эрх зүйн чиглэлээр “Хууль бус уул уурхайтай холбоотой эрүүгийн хэрэг хянан шийдвэрлэх ажиллагааны төлөв байдал”, “Хууль бусаар мод бэлтгэх гэмт хэргийн шүүхийн практик, хуульчлагдсан байдалд хийсэн дүн шинжилгээ”, Хувийн эрх зүй чиглэлээр “Байгаль орчинд учирсан хохирлыг иргэний журмаар шаардах асуудал”, “Уул уурхайн салбарт байгаль орчинд нөхөн сэргээлт хийх үүргээ гүйцэтгээгүйгээс учирсан хохирол, нөхөн сэргээлтийн төлбөр гаргуулах тухай маргааныг шийдвэрлэж буй шүүхийн практикийг “бохирдуулагчаар нөхөн төлүүлэх” зарчимтай уялдуулан авч үзэх нь”, Захиргааны эрх зүйн чиглэлээр “Байгаль орчны болон соёлын өвийг хамгаалах асуудлаар төрийн бус байгууллагад нэхэмжлэл гаргах эрхийг олгохтой холбоотой Япон улсын өнөөгийн чиг хандлага”, “Захиргааны хэргийн шүүхэд байгаль орчныг хамгаалахтай холбоотой хэрэг маргааныг хянан шийдвэрлэж буй байдал” ,“Үндсэн хууль, байгаль орчны хамгаалал, байгалийн баялаг, эрүүл орчинд амьдрах эрх ба Цэц” зэрэг сэдвээр шүүгч, судлаачид илтгэл хэлэлцүүллээ.

Уг хуралдаанд хэлэлцүүлсэн судалгааны бүтээлүүдийг “Монголын төр эрх зүй” эрдэм шинжилгээний сэтгүүлийн тусгай дугаарт нийтлэх юм байна.