“WeLoveU" олон улсын байгууллагаас энэ сарын 12-нд буюу өчигдөр нийслэлийн Хан-Уул дүүргийн Туул гол орчимд “Clean world” буюу “Цэвэр дэлхий” хөдөлгөөн өрнүүлж цэвэрлэгээ хийжээ.

“Цэвэр дэлхий” хөдөлгөөний хүрээнд нийслэл хотын ундны усан хангамжийн эх үүсвэр болсон Туул голын эргийн дагуух нэг км орчим талбайн хог хаягдлыг цэвэрлэх ажилд WeLoveU байгууллагын гишүүн, тэдний ар гэр, найз хөрш зэрэг ойролцоогоор 400 гаруй хүн цэвэр цэмцгэр орчин бүрдүүлэхийн төлөө сэтгэл хүслээ нэгтгэн оролцсон байна.  Тус хөдөлгөөнөөр сайн дурынхан Туул голын эргийн дагуу, мөн усны захаар хөглөрсөн хаягдал цаас, хуванцар, резин, хуванцар эдлэл, төмөр, архи, ундааны шил, нэг удаагийн хэрэглээ гэх мэт 350 гаруй уут ахуйн хог хаягдал цэвэрлэжээ.

“Цэвэр дэлхий” хөдөлгөөний үйл ажиллагаа зөвхөн Улаанбаатар хотод төдийгүй мөн Эрдэнэт хотод нэгэн зэрэг өрнөсөн байна. WeLoveU байгууллагын Эрдэнэт хот дахь сайн дурын гишүүд Сархиа уулын хог хаягдлыг цэвэрлэсэн юм.

 “Цэвэр дэлхий” хөдөлгөөн дэлхийн байгаль орчин бол хүн төрөлхтний халамжтай нягт уялдаа холбоотойг харгалзан, унаган байгалиа хайрлан хамгаалж хүн төрөлхтний тогтвортой аз жаргалыг дэмжихэд чиглэсэн WeLoveU-гаас зохион байгуулдаг байгаль орчин, халамжийн хөдөлгөөн юм. Энэхүү хөдөлгөөн нь Монголоос гадна Солонгос, АНУ, Мексик, Перу, Нидерланд, Герман, Малайз, Пакистан, Кени, Того, Австрали зэрэг 35 оронд явагдаж байна. Тус байгууллага “Цэвэр дэлхий” хөдөлгөөн тэргүүтэй ажлаараа Олон улсын хамтын нийгэмлэгийн нийтлэг зорилго болох Тогтвортой хөгжлийн зорилтуудыг хэрэгжүүлэхэд идэвхтэй оролцдог аж.