Шууд Chart

Томуу, томуу төст өвчнөөр өвчилж байгаа хүүхдүүдийн 80 хувь нь 15 хүртэлх насныхан байна

2022-12-09 15:46:26

ХӨСҮТ-өөс томуу, томуу төст өвчний талаар болон бусад цаг үеийн асуудлаар мэдээлэл хийлээ.

Энэ үеэр ХӨСҮТ-ийн тандалт судалгааны албаны дарга Ж.Байгалмаа ярихдаа "Манай улсын хэмжээнд томуу, томуу төст өвчин идэвхжлийн түвшинд байна. Зарим орон нутаг улбар шар түвшинд орсон хэдий ч томуу, томуу төст өвчнөөр өвчлөгчдийн амьсгалын замын цочмог хүнд халдвараар эмнэлэгт хэвтэн эмчлүүлж байгаа хүүхдүүдийн тоо нэмэгдсэн. Өнгөрсөн 47 дугаар долоо хоногт Монгол Улсын хэмжээнд 7,213 хүүхэд томуу, томуу төст өвчний амьсгалын замын цочмог хүнд халдварын шалтгаантайгаар эмнэлэгт хэвтэж эмчлүүлснээс 1,510 буюу 18 хувь нь амьсгалын замын цочмог хүнд халдвартай байна.

Томуу, томуу төст өвчнөөр өвчилж байгаа хүүхдүүдийн 80 хувь нь 15 хүртэлх насны хүүхэд байна. Үүний дотор амьсгалын замын цочмог хүнд халдвараар өвчилсөн хүүхдүүдийн 89 хувь нь 15 хүртэлх насныхан. Түүнчлэн амьсгалын замын цочмог хүнд халдвартай 0-4 насны хүүхэд 15 хүртэлх насны хүүхдүүд дундаас 75 хувийг нь эзэлж байна.

46 дугаар долоо хоногоос эхлэн Монголд томуугийн үүсгэгч бүртгэгдэж эхэлсэн ба В хүрээний вирус бүртгэгдсэн. 47 дугаар долоо хоногоос томуугийн А хүрээний H1N1 вирус орчилд орж, өвчлөл үүсгэж эхэлсэн. Энэ жил улирлын томуу өвөрмөц явцтай байх нь тандалт судалгаагаар харагдаж байгаа. Дээрх хоёр өөр төрлийн вирус хүн амын дунд эргэлтэд ороод өвчлөл үүсгэж эхэлсэн бөгөөд нэмээд коронавирусийн халдвар байна.

Монгол Улсын хэмжээнд энэ долоо хоногт 933 коронавируст халдварын шинэ тохиолдол бүртгэгдсэн. Энэ нь өнгөрсөн долоо хоногтой харьцуулахад хоёр дахин буурсан үзүүлэлттэй байгаа юм. Одоогоор улсын хэмжээнд омикроны гурав дахь оргил үе явагдаад буурч байна. Хувилбарын тандалт шинжилгээгээр нийт сорьцын 69 хувьд омикроны BQ1.2 хувилбар бүртгэгдсэн. Өвчлөлийн хувьд халдвар авсан тохиолдолд хөнгөн өвчилж, эдгэж байна. Өнгөрсөн долоо хоногийн хувьд коронавируст халдварын улмаас нэг хүн нас барж, улсын хэмжээнд нийт нас барсан иргэдийн тоо 2,315 болов" хэмээлээ.

Нийтэлсэн: Эрүүл мэндийн яам

Томуу, томуу төст өвчнөөр өвчилж байгаа хүүхдүүдийн 80 хувь нь 15 хүртэлх насныхан байна  
Үзсэн: 116 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй