Тус хуулийн 36.16-д “Гадаад улсын үнэт цаасны зах зээлд үнэт цаас худалдах, худалдан авахад зуучлах үйл ажиллагааг Хорооны зөвшөөрлөөр эрхэлнэ” гэж зааснаар гадаад улсын үнэт цаасны зах зээлд үнэт цаас худалдах, худалдан авахад зуучлах үйл ажиллагааг зөвхөн Хорооны зөвшөөрөлтэйгээр эрхлэхээр хуульчлагдсан.

 

Үүний дагуу Хороо 2014 оны зургаадугаар сарын 11-ний өдөр 198 дугаар тогтоолоор “Үнэт цаасны зах зээлд зохицуулалттай үйл ажиллагаа эрхлэх тухай журам”-д дээрх харилцааг нарийвчлан зохицуулсан нэмэлт, өөрчлөлтийг оруулаад байна. Иймд гадаад улсын үнэт цаасны зах зээлд үнэт цаас худалдах, худалдан авахад зуучлах үйл ажиллагааг тус Хорооноос зөвшөөрөл авсан зохицуулалттай этгээд эрхлэх бөгөөд дээрх журмын нөхцөл, шаардлагыг ханган, холбогдох бичиг баримтыг албан хүсэлтийн хамт Хороонд ирүүлж, уг зөвшөөрлийг авах боломжтой юм.

 

Гадаад улсын үнэт цаасны зах зээлд үнэт цаас худалдах, худалдан авахад зуучлах үйл ажиллагааг Хорооны зөвшөөрөлгүйгээр эрхэлсэн тохиолдолд Үнэт цаасны зах зээлийн тухай хуульд заасан хариуцлага ногдуулж, зөвшөөрөлгүй үйл ажиллагаа эрхэлснээр олсон орлогыг хураах, хэрэв бусдыг хохироосон эрүүгийн гэмт хэргийн шинжтэй бол холбогдох цагдаагийн байгууллагад шилжүүлэхийг үүгээр анхааруулж байна.