Дэлхийн Цахим Боловсролын Чуулга уулзалт (WDEC) “Боловсролын хөгжил ба шинэчлэл: Оюун ухааны эрин үе” сэдвийн дор БНХАУ-ын Ухань хотноо өнөөдөр эхэллээ. Чуулга уулзалтад Боловсролын сайд П.Наранбаяр оролцож байна.

Энэхүү чуулга уулзалт нь дэлхийн улс орнуудын боловсролын салбарт тулгамдаж буй асуудлыг хэлэлцэх, цахим шилжилтийг дэмжих, туршлага солилцох зорилготой юм. “Сургалт-Суралцахуй-Удирдлага-Үнэлгээ-Судалгаа” зэрэг боловсролын бүх түвшинд дижитал шийдэл, технологийг хэрхэн үр дүнтэй нэвтрүүлэх талаар оролцогч талууд хэлэлцэх юм.

Чуулганд 70 гаруй орны төр, засгийн газрын төлөөлөгчид, НҮБ болон олон улсын байгууллагууд, элчин сайд нар, дижитал технологийн мэргэжилтнүүд, их, дээд сургуулийн судлаачид, ерөнхий боловсрол болон мэргэжлийн боловсролын сургуулиудын төлөөлөгчид оролцож байна.

Сүүлийн жилүүдэд цахим боловсрол нь тэгш хүртээмж, ил тод байдал, насан туршийн суралцах боломжийг нэмэгдүүлж, боловсролын шинэ хэв шинжийг бүрдүүлж байгааг олон улсын байгууллагууд онцолж байна. Тус чуулганы үеэр “Дэлхийн Цахим Боловсролын Холбоо”, “Ухаалаг Боловсролын Платформ”, “Цахим Боловсролын Дэлхийн Хөгжлийн Индекс” зэрэг санаачилгуудыг танилцуулж, НҮБ-ын боловсролын дэлхийн шинэчлэлийн зорилготой уялдуулсан бодлогын хэлэлцүүлгүүд өрнөж байна.

Чуулганы үеэр Боловсролын сайд П.Наранбаяр Ухань хотын Биеийн тамирын их сургуулийн захирал ноён Чен Жипинтэй уулзаж, хоёр сургуулийн хамтын ажиллагааны явц, ирээдүйн төлөвлөгөөний талаар санал солилцлоо.

Уг их сургууль нь манай Боловсролын их сургуулийн харьяа Биеийн тамирын дээд сургуультай хамтран ажилладаг бөгөөд энэ хамтын ажиллагааны хүрээнд 2025 ондоо багтаан Ухань хотноо хоёр сургуулийн оюутнуудын дунд нөхөрсөг спортын тэмцээн зохион байгуулахаар төлөвлөж байгаагаа илэрхийлсэн юм.

Мөн энэ үеэр зохион байгуулагдсан үзэсгэлэнд зочлон, хиймэл оюун ухааны чиглэлээр хийгдэж буй шинжлэх ухаан, технологийн дэвшил боловсролын салбарт хэрхэн нэвтэрч, түүний хөгжилд хэрхэн хувь нэмэр оруулж буйтай танилцлаа.