Долоо хоног бүрийн даваа гарагт Засгийн газар ээлжит хуралдаанаа хийдэг. Өчигдөр хуралдсан Засгийн газрын хуралдаанаар дараах асуудлуудыг хэлэлцжээ. Тодруулбал, “Сайн малчин” хөтөлбөр болон  Мал аж ахуйн үйлдвэрлэлийг дэмжих дэд хөтөлбөрийг баталсан байна. Мөн Агаарын харилцааны тухай Монгол Улсын Засгийн газар, Бүгд Найрамдах Чех Улс, Бүгд Найрамдах Мальта Улс, Мьянмарын Холбооны Улс, Люксембургийн Их Вант Улсын Засгийн газар хоорондын хэлэлцээрүүдэд гарын үсэг зурах тухай асуудлыг хэлэлцэн дэмжиж, уг хэлэлцээрт гарын үсэг зурах эрх олгох тухай Ерөнхий сайдын захирамж гаргахаар тогтжээ.

Энэхүү хэлэлцээрүүд нь Олон улсын иргэний нисэхийн тухай 1944 оны Чикагогийн конвенцид нийцүүлэн, олон улсын хуваарьт нислэг гүйцэтгэхэд тавигдах нийтлэг шаардлага, зохицуулалтыг тодорхойлж, тал бүрээс томилогдсон агаарын тээврийн байгууллагуудын томилгоо, үйл ажиллагаа эрхлэх эрх, зөвшөөрөл, агаарын тээврийн байгууллагуудын нислэг үйлдэхэд мөрдөх багтаамж, тариф, гаалийн татвар, бусад хураамжийн тухай зохицуулалтыг тодорхойлсон байна.

Хэлэлцээрүүдийг байгуулснаар манай улсын агаарын харилцааны эрх зүйн зохицуулалт сайжирч, агаарын тээврийн байгууллагууд зах зээлээ өргөжүүлэх бодлоготой уялдуулан хоёр орны хооронд шууд нислэг гүйцэтгэхээс гадна, шууд бусаар буюу аяллын дугаар хуваан ашиглах зарчмаар нислэг гүйцэтгэх, агаарын тээвэрлэлтийн үр ашгийг дээшлүүлэхэд чиглэсэн илүү тодорхой зохицуулалт бүрдэх юм.

Засгийн газрын хуралдаанаар хэлэлцсэн асуудлуудыг товчлон хүргэе.

- Монгол Улс, Бүгд Найрамдах Франц Улсын хооронд дипломат харилцаа тогтоосны 50 жилийн ойг тэмдэглэсэн ажлын дүнгийн талаар Гадаад хэргийн сайд Л.Пүрэвсүрэн Засгийн газрын гишүүдэд танилцуулав.

- Өрийн удирдлагын зөвлөлийн ажиллах журмыг баталж, хэрэгжилтэд хяналт тавьж ажиллахыг Сангийн сайд Б.Болорт үүрэг болголоо.

- Унгар Улсын Ерөнхий сайд Виктор Орбаны 2016 оны 1 дүгээр сарын 24-26-нд Монгол Улсад хийсэн албан ёсны айлчлалын дүнг хэлэлцээд Үндэсний аюулгүй байдлын зөвлөлд оруулахыг Гадаад хэргийн сайдад даалгав.

- Гадаад хэргийн сайд Л.Пүрэвсүрэн 2016 оны 2-р сарын 19-ний өдөр Монгол Улсын хилийн Бургастай боомтод ажилласан дүнгийнхээ талаар гишүүдэд танилцууллаа.