Казакстаны Актобе  хотод  зохион байгуулсан тусгай ажиллагааны үеэр таван хүн амиа алдсан тухай мэдээллийг тус улсын Дотоод Хэргийн яамны хэвлэлийн албанаас мэдээлж  байна. Үүний зэрэгцээ хоёр хүнийг  саатуулан баривчлаад  байгаа юм байна.  Гэмт  хэрэгт сэжиглэгдэж байгаа  эдгээр хүмүүсээс  хулгайлсан  зэвсгүүдийг нь хураан авчээ. Өмнө нь тусгай ажиллагааны үеэр  дөрвөн хүн  алагдаж, долоон хүн саатуулагдсан тухай мэдээлж байсан юм.

Өнгөрсөн  ням гарагт  орон нутгийн цагаар  14:30 минутын үед  хэсэг залуус Актобе хот дахь зэвсгийн дэлгүүр рүү дайрч  худалдагч болон хамгаалалтын  албаны  ажилтны  амийг  хороосон байна.  Дотоод  Хэргийн Яамнаас мэдээлж байгаагаар  гэмт этгээдүүд  дэлгүүрээс олон  тооны буу зэвсэг  хулгайлсан байжээ. Цагдаагийнхан хэргийн газарт  ирэхэд  тэд  гал  нээснээс болж Дотоод Хэргийн яамны  гурван ажилтан гэмтэж,  шархаджээ. Гэмт этгээдүүд хэргийн газраас зугтаж явахдаа өөр  нэг  зэвсгийн  дэлгүүрийг  дээрэмдэж улмаар  Актобе хот дахь цэргийн  анги руу  явцгаасан  байна.  

Казакстаны Дотоод Хэргийн яамны албан мэдээгээр  энэ  халдлагуудыг үйлдсэн этгээдүүд нь уламжлалт  бус  шашны  урсгалын хэт  үзэлтнүүд  байжээ.  Одоо Актобе  хотод  онц  байдал  зарлаад  байна.   Худалдааны  төвүүд болон  томоохон дэлгүүрүүдийг хаагаад байгаагийн зэрэгцээ  нийтийн тээврийн хөдөлгөөн  зогссон байдалтай байна.  Түүнчлэн кино театр, амралт зугаалгын бүх төвийг хаажээ.