Улаанбаатар хотын харьяат 25 настай, эрэгтэй Солонгос улсад 2015 оноос хойш гэрээгээр ажиллаж байгаад 2016 оны тавдугаар сарын сүүлээр Монголд амрахаар иржээ. Улмаар 2016 оны зургаадугаар сарын 3-ны өдөр Солонгос улс руу буцаж явсан байна. Солонгос улсад хүнд үйлдвэрт ажилладаг, ажлын хашаанд нь шумуул ихтэй, шумууланд их хазуулсан өгүүлэмжтэй тэрбээр зургаадугаар сарын 4-ний өдөр биеийн ерөнхий байдал хүндэвтэр, нэг өдрийн давтамжтай, өндөр халуурчээ. Халуурах үедээ зүүн талын сүвэргэ орчмоор, ууц нуруу булчин нь өвдөж, халуун буурах үедээ их хөлөрч, халуу дүүгэн, ханиалган, бөөлжиж, бие нь загатнасан аж. Мөн арьс салст шарласан, цус багадалтын шинжтэй, элэг, дэлүү томорсны улмаас долоодугаар сарын 4-нд ХӨСҮТ-д хэвтэн эмчлүүлж эхэлжээ. Олон хоног бөөлжсөн түүний жин буурсан байна.

Өчигдөр 22:30 цагт ЗӨСҮТ-ийн лабораторит авчирсан сорьцыг эхний байдлаар өвчтөний цусанд хурдавчилсан сорил, бичил харах аргаар шинжлэхэд хумхаагийн үүсгэгч илэрсэн байна. Өвчтөний цусанд молекул биологийн шинжилгээгээр хумхаагийн үүсгэгч Plasmodium spp тодорхойлогджээ.

Эх сурвалж: ЗӨСҮТ