Улсын нэгдүгээр төв эмнэлэг "Сургалтын эмнэлэг" болон өргөжив. Өнөөдөр "Сургалтын эмнэлэг"-ийг танилцуулах өдөрлөг боллоо. Сургалтын эмнэлэгт эмч, сувилагч нар ажиллангаа суралцана. Өөрөөр хэлбэл, үндсэн ажлаа хийхийн хажуугаар профессор, багш нарын удирдлага дор мэдлэгээ дээшлүүлэх боломжтой юм байна. 

Үүнээс гадна анагаах ухааны чиглэлээр суралцаж байгаа оюутнуудад төгсөлтийн өмнөх сургалт явуулах үндсэн бааз болох юм.

Сургалтын эмнэлэгийн эмч, сувилагч, ажилтнуудын үүрэг хариуцлага өндөр юм. Тэд зөвхөн үйлчлүүлэгчийн оношлогоо, эмчилгээ, үйлчилгээнд анхаарал хандуулаад зогсохгүй эрүүл мэндийн салбарын ажилтныг сургах, хөгжүүлэх гэсэн давхар ачааг үүрнэ.

Ер нь дэлхий нийтэд эрүүл мэндийн салбарт ердийн эмнэлэг, сургалтын эмнэлэг гэсэн хоёр үндсэн загвар бий.

Эмнэлэгийн мэргэжилтнүүд төгсөлтийн дараа тасралтгүй суралцах боломжийг хангасан “Сургалтын эмнэлэг” төслийг дэлхийн олон улс оронд хэрэгжүүлж өндөр үр дүнд хүрээд байгаа. Харин Улсын нэгдүгээр төв эмнэлэг энэ стандартыг Монголд нэвтрүүлсэн анхны эмнэлэг болж байгаа юм.

Энэхүү шинэ алхам нь манай улсад эрүүл мэндийн салбарыг хөгжүүлэхэд чухал үүрэг гүйцэтгэнэ. Монголд "Сургалтын эмнэлэг" зайлшгүй хэрэгцээтэй байсан. Эмч, сувилагч нарт тэтгэлэг, цалин өгөөд мэдлэг чадварыг нь дээшлүүлэх боломжтой боллоо.

Гуравдугаар шатлалын бүхий л эмнэлгүүд бие даасан сургалт зохион байгуулахаас гадна төгсөлтийн өмнөх, дараах сургалтуудад оролцох боломжтой.