Өнгөрсөн  даваа гарагт хөөргөсөн  Хятадын "Шэньчжоу" сансрын  хөлөг онгоц  тойрог  замд  байрлаж байгаа  "Тяньгун 2" лабораторид  амжилттай залгагдаж, багийн 2 гишүүн тус  лаборатори  руу ороод  байгаа  тухай  Синьхуа  агентлаг  мэдээллээ.

Энэ  удаагийн  нислэгийн багийн  ахлагч Цзин Хайпэн түрүүлж  лабораторид  орсон  байна.  Тэрээр  сансарт 3 дахь удаагаа нисч байгаа туршлагатай  нисгэгч  юм. Харин  түүнтэй хамт  ниссэн Чэнь Дуны  хувьд  энэ нь  анхны  нислэг аж. Сансрын  нисэгчид  юуны түрүүнд  сансрын  байгууламжийнхаа  системийг  нягтлан шалгасан  байна.  Сансрын  нисэгчдийн  энэ  багийнхан тойрог замд хамгийн удаан хугацаагаар буюу 33  өдөр  болох гэнэ.

Гэхдээ  30  хоногт нь "Тяньгун 2"  лабораторид  ажиллах  юм байна. Энэ хугацаанд тэд  анагаах ухаан болон шинжлэх  ухааны  олон туршилтуудыг хийхээр  төлөвлөж  байгаа юм.  Хятад  улс  өнгөрсөн даваа гарагт  орон нутгийн цагаар  өглөөний 7  цаг  30 минутанд  "Цюцюань"  сансрын  буудлаасаа  "Шэньчжоу"  хөлгөө  хөөргөсөн  билээ. Тус хөлгийг  "Чанчжэн 2" пуужин тээвэрлэгчийн  тусламжтайгаар  ийнхүү тойрог замд  амжилттай оруулсан юм.