Тайландын нийслэл Банкок хотноо эмч нар, тэнгисийн ногоон яст мэлхийд хагалгаа хийж, түүний биеэс 915  зоос гарган авсан тухай олон улсын хэвлэлүүд онцолж байна. Тодруулбал, энэ сарын 6-ны өдөр Тайландын зүүн хэсгийн Сри Рача хэмээх хотын усан санд амьдардаг, тэнгисийн ногоон яст мэлхий сэлж чадахаа больж, бие гэнэт муудсан байна. Түүний гэдэс нь ихээр томорч, улмаар амь насанд нь аюул учирсан тул, Банкок хотноо яаралтай авчран мэс засал хийж, ходоодноос нь 915  зоос гарган авчээ.  Уг хагалгаа нийтдээ 7 цагийн турш үргэлжилсэн бөгөөд дэлхийд анх удаа ийм төрлийн хагалгаа болжээ.

Түүний гэдсэнд нийт 5 кг жинтэй зоосон бөмбөлөг үүссэн байсан бөгөөд, Тайландчууд тэр яст мэлхийг мөнгөний гахайтай зүйрлэн мөнгөний яст мэлхий хэмээн нэрлэх болсон аж. Энэ үйл явдлын гол учир шалтгаан нь жуулчид түүний амьдардаг усан санд аз авчирдаг зоос байнга шиддэг байсантай холбоотой байжээ. Өдгөө 25 настай Омсин хэмээх энэхүү яст мэлхий сүүлийн хэдэн жилийн турш тус усан санд амьдарч байгаа юм. Омсин яст мэлхийд дахиад 6 сарын эмчилгээ хийх хэрэгтэй гэдгийг түүнд хагалгаа хийсэн, Тайландын их сургуулийн эмч нар хэлж байна. Тэнгисийн ногоон яст мэлхий нь 80 орчим жил насалдаг, устах аюулд орсон амьтдын жагсаалтад багтдаг юм байна. 

---

	Яст мэлхийний биеэс 915 зоос гаргаж авчээ
Үзсэн: 3389	Mongolian National Broadcaster