БСШУСЯ, Засгийн газрын хэрэгжүүлэгч агентлаг Биеийн тамир, спортын газар болон Допингийн эсрэг үндэсний төвөөс хамтран хэрэгжүүлж байгаа “Допингүй эсрэг үндэсний хяналт” төслийн хүрээнд үндэсний бөхчүүдээс сэргээшийн шинжилгээг авсан билээ. 2017 оны арванхоёрдугаар сард нийт 31 бөхөөс допингийн шинжилгээ авахад таван бөх хориотой бодис хэрэглэсэн нь тогтоогдсон.

Допингийн эсрэг үндэсний төвөөс допингийн шинжилгээнд бүдэрсэн бөхчүүдийн нэрийг зарласан бөгөөд үүнд аймгийн хурц арслан Б.Номиндалай, сумын заан С.Майнбаяр, улсын начин Э.Даш, улсын гарьд Ө.Бат-Орших нар багтсан. Эдгээр бөх “А” сорьцын шинжилгээний хариуг хүлээн зөвшөөрсөн бол нэг бөх “В” сорьцын шинжилгээнд хамрагдах хүсэлтээ өгсөн билээ.

Өнгөрсөн долоо хоногт Монгол Улсын гарьд Ө.Бат-Орших өөрийн байр сууриа илэрхийлсэн бол энэ удаа Дундговь аймгийн Эрдэнэдалай сумын харьяат, улсын начин Э.Даш ийнхүү тайлбарлав.

“Сайн байцгаана уу. Та бүхэнд энэ өдрийн мэнд хүргэе. Допингийн эсрэг үндэсний төвөөс хийсэн мэдэгдэлтэй холбоотой тайлбарыг хүргэж байна. 2016 оны зургадугаар сарын 28-нд болсон наадмын сорилго барилдаанд барилдаж байгаад баруун тохойгоо мулталсан болно. Бүрэн гүйцэд эдгээлгүй барилдсаны улмаас барилдааны явцад хоёр удаа хөндөгдөж тохой орчмын зөөлөн эд, үеийн шингэн, шүрмэсийн хатангиршил гэсэн оноштой эмчилгээний явцад өвчин намдаах эм бэлдмэл эхэсийн тарилга хийлгэсэн юм. Зураг дээрх тарилгыг эхэс нөхөн сэргээх зорилгоор эмчилгээнд хэрэглэсэн болно. Гэтэл энэ нь арванхоёрдугаар сарын 17-нд өгсөн шинжилгээгээр хориотой эмийн төрөл гэж гарсан байна. Бэртэл гэмтэлтэй тамирчид хэрэглэх эм бэлдмэл, уураг витаминээ маш анхаарал болгоомжтой хэрэглэх шаардлагатай юм байна” гэв.

Бөхчүүдээс допингийн шинжилгээг улсын их баяр наадмын дараа буюу заалны барилдааны үеэр авсан юм. Одоогоор Монголын үндэснийн бөхийн холбооноос албан ёсны тайлбарыг өгөөгүй байна.

Допингийн эсрэг үндэсний төвөөс 31 бөхийн шинжилгээг БНСУ-ын Шинжлэх ухаан техникийн институтын \KIST\ Допингийн хяналтын лабораторид шинжлүүлжээ.