Өмнөговь аймгийн "Говийн хүчтэн" дэвжээний ээлжит барилдаан өчигдөр "Мон Алтиус" дээд сургуулийн зааланд боллоо. Барилдаанд өнөө цагт Өмнөговийн бөхчүүдээ магнайлан барилдаж буй улсын начин Б.Сумъяа, Ц.Одбаяр нарын тэргүүтэй 32 бөх хүч үзсэн юм.

Ийнхүү Хүрмэн сумын харьяат, Онцгой байдлын газар, "Таван толгой" ХК-ийн бөх, аймгийн хурц арслан Шоовдорын Дарханбат тав даван түрүүлж, Булган сумын харьяат "Алдар" спорт хороо, Зэвсэгт хүчний 353-р ангийн бөх, улсын начин Баатарын Сумъяа үзүүрлэлээ.

Их шөвөгт Ханхонгор сумын харьяат "Алдар" спорт хороо, ЗХ-ний 350-р анги, "Ажнай" корпорацийн бөх, улсын начин Цэдэнбазарын Одбаяр, Ноён сумын харьяат "Хилчин" спорт хороо, ХЦ-ийн 0208-р анги, "Апу" ХК-ийн бөх, аймгийн арслан Ё.Эрдэнэбатын хүү, аймгийн арслан Нямаа нар шалгарлаа.

Гурвын даваа
1. У.н Б.Сумъяа- а.н Б.Оргио
2. У.н Ц.Одбаяр- а.з Ц.Анхбаяр
3. А.х.а Ш.Дарханбат- а.н Л.Отгончулуун
4. А.х.а Б.Мижидсүрэн- а.а Э.Нямаа

Дөрвийн даваа
1. У.н Б.Сумъяа- а.а Э.Нямаа
2. У.н Ц.Одбаяр- а.х.а Ш.Дарханбат

Тавын даваа
1. У.н Б.Сумъяа- а.х.а Ш.Дарханбат

Энэхүү барилдаан Хүрмэн сумын нэрэмжит болон зохион байгуулагдсан бөгөөд түрүү бөх нэг сая, үзүүр бөх 800, их шөвөгт шалгарсан бөхчүүд тус бүр 500 мянган төгрөгийн бай гардсан юм.