...Олон хоног бэлтгэж товлосон хурал зохион байгуулах ажилд маш түшигтэй тусалсан нь мэдээж Баасандорж гуай. Энэ хүн улсын байгууллагад ч хувийн хэвшилд ч олон нийтийн байгууллагад ч олон жил сайн ажиллаж байсан болохоор энэ мэт юманд үнэхээр туршлагатай байв. Бааска ах маань олон таван үггүй, юманд адгаж яардаггүй уужуу амгалан зан төлөвтэй хүн. Алхам тутамдаа бид хэдэд түшигтэй нь үнэхээр мэдрэгдэж байв. Олон жил өнгөрчээ. Юм юм бүдгэрч мартагдсаар байна. Хурал их л халуун болсон.Батлан Хамгаалахад туслах нийгэмлэгээс авто спорт мотоциклийн уралдаан зохиож болсоор байтал дахиж тамгатай холбоо нэгээр нэмэгдэх нь хэнд хэрэгтэй юм, ер нь авто аялал ч гэх, уралдаан ч гэх шиг гээд олон хүн ам уралдан яриа эхлүүлж лавшрах тусам халуухан болов.Үндэсний олимпийн Хорооноос хэн оролцлоодоо байз ямарч байсан нэг хүн босч ийм холбоо байхад буруудахгүй ,яагаад гэвэл үүсэл санаачилгын байгууллагыг дэмжих нь манай бас нэг үүрэг гэж байв. Жанжин штабын дарга генерал Гаваа гуай их идэвхитэй байж дахиан дахин үг хэлж байлаа. Хурлыг урьд нь тохиролцсон ёсоор Ч.Сайханбилэг удирдан явуулсан. Тэр үед Төрийн бус байгууллагын тухай хууль хараахан гараагүй байсан цаг. Олон нийтийн байгууллагын тухай Ч.Сайханбилэг сүрхий сайн мэдлэгтэй нь хурал удирдаж байх явцад нь тодорхой харагдаж байв. Нийслэлийн Цагдаагийн газрын хэв журмын хэлтсийн дарга Гарамжил гуай Гаваа гуайтай санал нэгдэж Батлан хамгаалахад туслах нийгэмлэгийн зүгээс техникийн болон мотоциклийн уралдаан хангалттай сайн зохион байгуулж байхад энэ ч илүү л болов уу гэсэн байр суурьтай байлаа.Энд холбоо байгуулах бүхий л ажилд маш идэвхитэй оролцож бидний ажилд тусалсан Отгончимэг гэж эмэгтэйг дурьдах хэрэгтэй. Отгоо хурлын явцын протокол ч хөтөлсөн Тэр үед чинь хүн бүр ширээн дээрээ компьютэртэй болоогүй цаг. Тэр их бичиг данс юмыг Отгоо л эмхлүүлсэн.

Хожим Хан-Уул дүүргийн тамгын газрын боловсролын асуудал эрхэлсэн дарга болсон явсан даа.Гэтэл Батлан Хамгаалах Яамны дэргэд байгуулагдсан “Зэв” концерны дарга Алтангэрэл гуай дэмжсэн. Хүмүүсийн санал олон талтай байлаа.Энэ байгууллагын нэр нь Монголын Авто Спорт аялалын үндэсний клуб нэртэйгээр байгуудлагдах болов. Орчин үед хүн бүр айл бүр машин унаатай болж байгаа. Цаашид ч нэмэгдэнэ. Иймд авто аялалыг түлхүү хөгжүүлэх цаг иржээ гэж ярилцаж байв. Энэ бодлогын чиглэлийг анхлан ярьсан хүн гэвэл манай Баасандорж гуай.Энэ нь Батлан хамгаалахад туслах нийгэмлэгээс явуулдаг мотоциклийн уралдаанаас өөр үйл ажиллагаа эхлүүлж болох цаг нь ирсэн хэлж байлаа.Тэр үед Чингис зочид буудлын ашиглалтын өмнөх захиргаа гэж байсан бөгөөд энэ захиргааны дарга нь Булган гэж хүн байлаа. Бидний ажлыг их дэмжиж бүх ажилд идэхитэй оролцсон хүн. Авто уралдаан болон олон өдрийн аялал хөгжиж эхэлбэл улс орон даяар батлагдсан замын шинэ сүлжээ бий болж хяналтад авснаар дүрэм журамтай бий болж ядаж л хаа хамаагүй гарч байдаг замыг цэгцлэх зүлэг ногоо газар шороог хамгаалах хуулийн тухай асуудал босч ирнэ. Байгаль газар хөрсөө бусниулахгүй болох шинэ эрин үе эхлэх ёстой гэсэн нь хүмүүст шинэ санаа тарүүлсэн байх. Булган гуай шинэ байгууллагын дэд ерөнхийлөгчөөр сонгогдсон.Энэ хурал таван цаг гаруй үргэлжлэв. Хэд хэдэн талаас ширүүн маргалдаж байж санал нэгдэн дүрмээ сонсож Монголын Авто спорт Аялалын Үндэсний Клуб нэртэйгээр байгуулагдав. Еранхийлөгөөр нь “Женко” Х.Баттулгыг сонгож байж билээ. Найз Батаа маань Бааска ах Зоригоо гээд бүгд тун их баярлаж билээ. Хожим бодоход олон жил маш сайхан өргөжиж олон арван уралдаан тэмцэн зохиож гадаад оруудад эх орныхоо нэрийг сайнаар дуурсгах их үйлсийн эхлэлийг тавьсан байв. Тэр үед хожмын амжилтуудаа мөрөөдөж л байсан даа. Ингээд зургаан сард анхны авто аяллын тэмцээнээ зохион байгуулахаар болов.Таван сар гарчээ. Их эрт дулаарсан байв.Хотын залуучууд бараг зуны хувцсандаа орсон байв. Миний ажил хөвөрдөгөөрөө хөвөрч Батаа маань хааяа нэг утсаар ярихдаа дараагийн ажлууд эхлэх болж байгаа шүү гэдэгсэн. Нар төөнөсөн дулаан нэг өдөр Батаа эхний уралдаан болох газрын байдал бас зам харгуй үзье гэж манай руу давхиж ирэв. Миний ажил шингэрч овоо завтай байсан тул салхинд гарч толгой сэргээх нь бас чухал гэж бодоод тэгье л гэлээ. Тэгэхэд найз минь Тойота Ланд Круйзер 60 гэдэг машинтай байлаа.Хавар цагийн урин салхи зөөлөн илбэн, давхиж яваа машины цонхоор толгойгоо цухуйлган агаар сөрөхөд сэтгэл сэргэж тархи толгой цэлмэх мэт болж байлаа. Батаа бага хүүгээ, би охин хүү хоёроо дагуулав. Хүүхдүүд хотоос гарахад бас сэргэцгээжээ. Заан тэрэлжийн тийшээ давхилаа. Батаа зам шинжих багагүй туршлагатай болохоор дотроо тооцоолоод яваа бололтой. Надад мэдэх юм тун бага байлаа. Тэрэлжийн амны баруунтай хөглөрсөн их уулсын нөгөө талаар нь аажуу өгсөв. Жигтэйхан мод сондуултай ой дундуур эв тааруулж явсаар тэр их дүнхгэр уулын орой дээр гарлаа. Нөгөө Мэлхий хад тээр дор атганд багтахаар харагдана. Батаа газрын эв харж байгаа бололтой.Гайгүй налуутай газар эрнэ. Тээр хойуур боломжийн санагдсан юм байлгүй бууя гэж байна. Би тас зөрж -Энэ их налуутай газар юу юу ч үгүй бууна гэв үү, Чи газуураагүй биз гэхэд Батаа инээмсэглээд ­-За за тэгвэл ирсэн харгуйгаараа буцья даа гэсэн. Нүүр царайнд нь тэр уулын их налуугаар бууна гэсэн итгэлтэй шийдсэн байдал тодорхой харагдаж байсан шүү. Доошоо уруудсаар тэгш газарт орж ирлээ. Учиргүй дулаарч жалга хонхорын зуаан цас мөс хайлан өдрийн наранд шавар шабааг ихтэй болжээ.Тойрч, дайрч, гишгэж гарсаар яалт ч үгүй нэг хонхорт нам шигдэн суув.Ойр хавийн чулуу мод түүж дэвсэн чихэж дугуйнаас хиншүү ханхалтал хэсэг хаазлан зүтгүүлээд барсангүй. Хэд хэд угзчуулав Таг суужээ. Батаа машинаасаа гудас гарган хажуулахаар хэвтээд өгөв.Залхжээ. Нэг харсан хурхирч байна.Цаг гаруй унтаад босохдоо хүч орсон уу яасан жаахан зүтгээд л машинаа ядах юмгүй гаргав. Нар шингэж тэнгэрийн хаяа улайран ягаарч байх үес бид хот руу орлоо. Ингэж зам үзсэнээр удахгүй эхлүүлэх анхныхаа туршилтын уралдааны нэг чухал ажлыг амжуулсан юм.