...Зуны тэнгэрт түгсэн шөнийн одод сувд мэт гялалзан дугариг тэргэл сарны туяанд орчны байдал өдөр шиг үзэгдэв. Багууд майхан саваа аль хэдийнэ босгон хоол унд болон бужигнана. Гал тогооны арын ажил Цэцэг бүхнийг амжуулж байлаа. Дөлгөөн харцтай, нам дуугаар инээмсэглэн ярьдаг энэ бүсгүй Батхүлэгийн уралдааны бүхий л арын ажлыг түүртэлгүй амжуулж ирснийг энд зориуд дурдалтай. Заяа тавилангаар учирсан тэгш хосууд гэж Батболд, Батцэцэг хоёрыг хэлнэ дээ. Хэрэв Батхүлэг уралдаан Батболдгүйгээр босч ирээгүй бол Батболд Батцэцэгүйгээр энэ бүх ажлыг амжуулж амжилтад хүрэх байсан болов уу даа. Заяа түшсэн хань гэж Цэцэгийг л хэлнэ. Хэзээний наргианч наадамч Бадрууган найруулагч аль эрт хүн амьтан тойруулчихсан онигоо ярьж элгийг хөшөөж сууна. Аяллынхан галын наадам зохиож, дуулж хуурдан, унтах завгүй хөгжилдөн хонолоо. Урьд нь бие биеэ сайн танихгүй явсан ч зөвхөн уралдаан аяллаар холбогдож уулзсан цөөн өдрүүд тэднийг олон арван жил үерхсэн дотно андууд болгосныг харахад сайхан санагдана. Энэ бол спортын ач тус. Зовох цагт дэм үзүүлж, учирсан бэрхшээл бүрийг хамт туулж амжилтад хүргэдэг нь баг хамт олны спорт. Тамирчид хором мөч, сөөм газрыг төлөө үхэж хатан тэмцэлдэж ёстой л эрэгчин, эмэгчнээ үздэг боловч дараа нь найрсагаар тэврэлдэж гар гараа атгаж баяр хүргэдэг. Авто спортын тамирчид эр зориг авхаалж самбаа сорьсон зарим үед үхлийн ирмэгт тулж, хүнд бэрх хоромхон зуур шийд гаргаж туулж давахдаа ч нөхдийгөө бодож л явдаг. Энэ өдрийн уралдаанд бүгдээрээ л амжилттай сайн оролцохыг хүссэн. Тэд чин сэтгэлээсээ өрсөлдөж , хүч чадлаа шавхтал дайчлан үнэхээр мэрийсэн байлаа.