... Урьд нь айл амьтан бужигнаж түжигнээд унтуулдаггүй байсан. Одоо бүр элдэвийн юм бодогдоод нойр ч хүрэхээ байж. Балдан хэд хоног ууц нуруу нь өвдөөд болдоггүй. Би өчигдөр, өнөөдөр хоёр нөгөө цагаан утсыг нь барьж баахан зогслоо. Балдан гэдэг чинь манай хөршийн нэг буурал байдаг юм. Амьдрал нь хэцүү. Ганц өргөмөл охинтой. Охин ч гэж дээ одоо бараг авгай, нөхөр нь эрт хаяад явчихсан юм. Хөгшин нь тээр жил сөхрөөд өгсөн юм. Тэр охин нь мах комбинатын өлөнгийн цехэд байдаг юм уу даа хаашаа юм. Тэгээд аав зүгээр гэрт суухаар утас бариад зогс гэсэн юм байх.

 

Одоо энэ гадуур барьж зогсоод хүн яриулдаг утас байна аа даа. Тэрийг чинь л хэлж байгаа юм. Өчигдөр зогссон золтой л осгочихсонгүй. Амьтан хүн ес эхэлчихлээ гэх юм. Энэ зурхайчид ч юугаа зурж суудаг юм бэ? Уг нь арванхоёр дугаар сарын хорь гээд ес эхэлдэг гэдэг мэдэхгүй. За тэр ес мөс ч яамай. Энэ цагаан утас ер нь золигийн эд юм. Хоёр хоног зогсоход юу эс сонслоо. Өчигдөр нэг гайгүй сайхан хувцастай аюулгүй зүс царайтай хүүхэн ярьж байна аа.                                                                     

 

 

 

 

Халаасаа ухаж ухаж халтар зуут гаргаж өгөөд муусайн юмнууд давраад байдаг юм наадах чинь ингэж зогсох хориотой, цагдаад өгчих юмсан... юу юу гэнэв ээ, ёстой нэг бузартай амьтан байна билээ. Тэр муухай амьтанд загнуулж бүр дарамт ихэдчихлээ байна. Хүмүүсийн худлаа ярихыг яана аа. Би энд явж байна, тэнд явж байна, тэгсэн болдоггүй, ингэсэн чинь больчихлоо ч гэх шиг. Худлаа ярьж байгаа хүн андашгүй. Ер нь утас барьж зогсож байгаа хүмүүс элдвийн юм сонсдог юм даг аа. Нэгэнт мөнгөө төлөөд ярьж байгаа юм хойно одоо ярьж л байхаас биш. Сонсож зогсох нь хэцүү юм. Тэр нэг Багануур руу яваа хүүхэн яах аргагүй нөхөртөө худлаа ярьсан. Яана даа яана. Бүр нэг зэвүү хүрээд, нойр хүрдэггүй. Ер нь Балданг утас барьж битгий зогс гэж хэлдэг ч билүү. Элдвийн юм дуулж сэтгэл нь хямраад хэвтсэн дэг ээ. Ээ тэр нэг Багануур явсан хүүхэн үү... Нөхөрт нь хэлчих юмсан.