Манай суваг 2016 оны УИХ-д нэр дэвшиж буй бүх нам, эвслийн дарга нарыг өнөөдөр 21.00 цагаас ярилцлага, мэтгэлцээнд урьсан гэж “Монголын мэдээ” сувгийн захирал Ц.Мөнхтөр хэллээ.  Энэ талаар бид дараах тодруулгыг авлаа.

-“Монголын мэдээ” суваг мэтгэлцээн явуулах эрхтэй юу?

-Сонгуулийн сурталчилгаа явуулах тухай СЕХ-ноос гаргасан журамд “Хэрвээ телевиз 2 ба түүнээс дээш сувагтай бол сонгуулийн сурталчилгааг үндсэн сувгаараа явуулна” гэж заасан. Энэхүү журмын дагуу МҮОНРТ-ийн нэгдүгээр сувгаар сонгуулийн сурталчилгаа цацагдсан. “Монголын мэдээ” сувгийн хувьд үндсэн сувгийн дараа байгуулагдсан учраас энэхүү журмыг дагаж мөрдөж, ямар ч сонгуулийн сурталчилгаа гаргаагүй. Гэхдээ “Мэтгэлцээнийг сонгуулийн сурталчилгаанд тооцохгүй” гэсэн СЕХ-ны журмын дагуу өнөөдөр 15 нам, эвслийн дарга нарын дунд энэхүү мэтгэлцээн, ярилцлагыг зохион байгуулж байна.

-Нам, эвслийн удирдлагууд хэдий хэр хугацаанд юуны талаар мэтгэлцэж, ярилцах вэ. Дэлгэрэнгүй мэдээлэл өгөөч?

-Орой 21.05 минутад эхлэх хэлэлцүүлэг ойролцоогоор 23.40 минут хүртэл үргэлжилнэ. Бидний зүгээс СЕХ-ны журмын дагуу бүх нам, эвслийн удирдлагуудад адил тэгш боломжийг олгоно. Үзэгчдийн хувьд энэхүү мэтгэлцээнээс Монголын нам, эвслүүд 2016 оны УИХ-ын сонгуульд ямар мөрийн хөтөлбөртэй оролцож буй талаарх мэдээллийг хүлээн авах боломжтой.