Нийгмийн бодлого, боловсрол, соёл, шинжлэх ухааны байнгын хорооны гишүүн Н.Учрал өнөөдөр БНСУ-ын Бусан, Улаанбаатар хотуудын харилцааг хөгжүүлэх, тэр дундаа эрүүл мэндийн салбарын хамтын ажиллагааг эрчимжүүлэх асуудлаар “Айр Бусан” компанийн төлөөлөлтэй уулзаж, санал солилцлоо.

Уулзалтын эхэнд УИХ-ын гишүүн Н.Учрал Улаанбаатар, Бусан хоёр хотын хооронд шууд нислэг үйлдэж эхэлсэнд баяр хүргээд тус байгууллагын олон улсын түвшинд нийгмийн хариуцлагаа хэрэгжүүлдэг ажлуудын нэг нь эрүүл мэндийн тусламж, үйлчилгээ байдагт талархалтай байгаагаа илэрхийлэв.

Тэрбээр “Манай улсын хэмжээнд зүрх судас, хавдар, элэгний өвчлөл нас баралтын дийлэнх хувийг эзэлж байна. Мөн нялхсын эндэгдэл нэмэгдэх хандлагатай байгаа. Эрүүл мэндийн байгууллагуудад шаардлагатай тоног төхөөрөмж хангалтгүй байдгийн зэрэгцээ иргэдийн хувьд урьдчилан сэргийлэх үзлэг, оношилгоо хийлгэхгүй цаг алддаг байдал нь гол шалтгаан болж байна. Би Нийгмийн бодлого, боловсрол, соёл, шинжлэх ухааны байнгын хорооны гишүүн учраас энэ асуудалд анхаарлаа хандуулж, ажиллана. БНСУ-ын Бусан хотын эрүүл мэндийн холбоодтой хамтран ажиллах сонирхолтой байна. Тухайлбал, Улаанбаатар хотын иргэдийг эрүүл мэндийн багц үзлэг, оношилгоонд хамруулах ажлыг зохион байгуулах шаардлагатай байна” гээд энэ чиглэлээр хамтын ажиллагааг хөгжүүлэх сонирхолтой байгаагаа илэрхийлсэн юм.

“Айр Бусан” компанийн Монгол дахь суурин төлөөлөгч Ким Жан Ху ирэх 10 дугаар сард БНСУ-ын Бусан хотын аялал жуулчлалын болон эрүүл мэндийн байгууллагын холбооны төлөөлөгчид Монгол Улсад ирж, уулзалт хийхээр төлөвлөснийг дуулгав. Мөн тэрбээр эмнэлэгийн тусламж, үйлчилгээг сайжруулах, эм, эмнэлэгийн хэрэгслийг нийлүүлэх, Монгол Улсад оношлогдохгүй байгаа өвчтөнүүдийг БНСУ-ын Бусан хотын эмнэлгүүдэд зуучлах, чадварлаг эмч мэргэжилтнүүдийн урьж, үзлэг оношилгоо хийлгэх зэргээр хамтран ажиллах боломжтой гэлээ.