Монгол Улсын маршал, Улсын баатар, Юмжаагийн Цэдэнбалын тухай баримтат, түүхэн уран сайхны киног “Хүмүүн фильм” уран бүтээлийн нэгдэл бүтээж байгаа талаар бид өмнө нь мэдээлсэн. Тус бүтээлийн кино зохиолч, ерөнхий продюсероор УИХ-ын гишүүн Ж.Мөнхбат, ерөнхий найруулагчаар А.Мөнхсүх нар ажиллаж байгаа. Мөн “Түүх мартахгүй” нэртэй дээрх түүхэн, баримтат уран сайхны кинонд Ю.Цэдэнбалын бага залуугийн дүрийг залуу жүжигчин Э.Саруул, идэр насны дүрийг УДЭТ-ийн жүжигчин, соёлын тэргүүний ажилтан Г.Амгаланбаатар, ахимаг үеийн дүрийг төрийн шагналт, гавьяат жүжигчин Ц.Төмөрбаатар амилуулсан билээ.

Тэгвэл саяхан тус киноны ерөнхий найруулагч А.Мөнхсүхээр ахлуулсан баг ОХУ-ын Буриадын театрт “Түүх мартахгүй” киноны зарим дүрд орос хэлээр дуу оруулах жүжигчид сонгох сонгон шалгаруулалт явуулжээ. “Түүх мартахгүй” бүтээл ирэх гуравдугаар сарын 1-нд нээлтээ хийх бөгөөд уран бүтээлчдийн зүгээс Монгол болон ОХУ-ын кино наадамд оролцуулахаар төлөвлөсөн байна.

Үүнээс гадна Буриадын театрын уран бүтээлчид удам дамжсан найруулагч А.Мөнхсүхийг “Монголын Фёдор Бондарчук” хэмээн тодотгожээ.

Дашрамд дуулгахад, дээрх кинонд ОХУ-ын уран бүтээлдээс Ю.Цэдэнбал агсны гэргий Анастасия Ивановна Филатовагийн идэр насны дүрд ОХУ-ын залуу жүжигчин Екатерина Кобба (Оросын телевизийн “Мөр” олон ангит кинонд гол дүр бүтээсэн) тоглосон. Харин А.И.Филатовагийн ахимаг насны дүрийг ОХУ-ын гавьяат жүжигчин Галина Анатольевна Бокашевская бүтээсэн юм. Үүнээс гадна ЗХУ-ын алдарт удирдагч Н.С.Хрущевийн дүрд ОХУ-ын гавьяат жүжигчин Виктор Балабанов, Л.И.Брежневийн дүрийг ОХУ-ын гавьяат жүжигчин Евгений Шмелев бүтээсэн.