Шууд Chart

Ерөнхийлөгч У.Хүрэлсүх Баян-Өлгий аймгийн иргэн Т.Даргерын гэрт зочиллоо

2023-03-22 09:49:43

Монгол Улсын Ерөнхийлөгч Ухнаагийн Хүрэлсүх Баян-Өлгий аймагт ажиллах үеэрээ иргэн Т.Даргерын гэрт зочиллоо.

Т.Даргерын хүү Д.Багдаулет нь Монгол Улсын Ерөнхийлөгчийн санаачилсан “Ерөнхийлөгчийн илгээлт-2100” тэтгэлэгт хөтөлбөрт шалгарч, ИБУИНХУ-ын Бристолын их сургуульд барилгын инженер мэргэжлээр элсэн суралцаж байгаа юм.

Д.Багдаулет нь Өлгий сумын Ерөнхий боловсролын 1 дүгээр сургуулийг 2021 онд төгссөн. Элсэлтийн ерөнхий шалгалтын математикийн төрөлд 758, англи хэлний төрөлд 800 оноог тус тус авч дундаж оноогоороо сум, аймгаа тэргүүлэн, улсын хэмжээнд 2 дугаар байрт жагссан амжилт үзүүлсэн. Мөн орон нутгаас англи хэлний шалгалтаар бүтэн оноо буюу 800 оноо авснаараа онцлогтой.

Монгол Улсын Ерөнхийлөгчийг Д.Багдаулетийн аав Т.Даргер, ээж Ш.Перизат болон гэр бүлийнхэн угтан мэндчилж, казах түмний Наурызын баярын мэндийг хүргэлээ.

Т.Даргер отгон хүү болох Д.Багдаулет нь өөрийн хүссэн мэргэжлээр олон улсын шилдэг их сургуульд элсэн суралцаж буйд баяртай байгаагаа хэлж, “Ерөнхийлөгчийн илгээлт-2100” хөтөлбөрийн ачаар олон хүүхэд, залуус гадаадын их, дээд сургуульд суралцах хүсэл мөрөөдлөө биелүүлэх боломжтой болсонд талархал илэрхийлэв.

Монгол Улсын нэрийг өндөрт өргөж, Монгол Улсын Ерөнхийлөгчийн гардуулсан төрийн далбааг ёс төртэй хадгалж, амжилттай суралцахыг хүүдээ захисан гэдгээ энэ үеэр хэлж байлаа.

Монгол Улсын Ерөнхийлөгч Ухнаагийн Хүрэлсүх “Ерөнхийлөгчийн илгээлт-2100” тэтгэлэгт хөтөлбөрт шалгарсан залуус хилийн чанадад өндөр боловсрол эзэмшин Монгол Улсын ирээдүйд үнэ цэнтэй боловсон хүчнийг бүрдүүлнэ гэдгийг онцлов.

Тухайлбал, Д.Багдаулет нь ИБУИНХУ-д суралцан төгсөж ирээд төрөлх нутаг, эх орныхоо хөгжилд өөрийн хувь нэмрийг оруулж, их үйлсийг бүтээнэ гэдэгт итгэлтэй байгаагаа хэлж, “Ерөнхийлөгчийн илгээлт-2100” хөтөлбөрт шалгарсан залуусыг үргэлж дэмжинэ гэлээ.

Монгол Улсын Ерөнхийлөгч монгол хүний дэлхийд өрсөлдөх чадварыг нэмэгдүүлэх, хүүхэд, залуучуудын суралцах тэгш боломжийг хангах, дэлхийн шилдэг их, дээд сургуульд суралцахад дэмжлэг үзүүлэх зорилгоор зарлиг гаргасан.

Энэ дагуу жил бүр 330 сум, нийслэлийн хороодоос тус бүр нэг шилдэг сурагчийг шалгаруулж, дэлхийн шилдэг их, дээд сургуульд суралцуулах “Ерөнхийлөгчийн илгээлт-2100” тэтгэлэгт хөтөлбөрийг 2021 оноос хэрэгжүүлж байна.

Харьяалагдах сум, хорооныхоо хамран сургах тойргийн сургуульд сүүлийн гурваас багагүй жил суралцан төгссөн, математик болон гадаад хэлний Элсэлтийн ерөнхий шалгалтын онооны дунджаар сум, хороондоо тэргүүлсэн суралцагч хөтөлбөрт хамрагдах боломжтой.

“Ерөнхийлөгчийн илгээлт-2100” хөтөлбөрийн хүрээнд ИБУИНХУ-д 29 монгол оюутан, дэлхийн шилдэг 100 их сургуулийн нэг Бристолын их сургуульд 15 монгол оюутан суралцаж байна.


Ерөнхийлөгч У.Хүрэлсүх Баян-Өлгий аймгийн иргэн Т.Даргерын гэрт зочиллоо  
Үзсэн: 436 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Батбаяр [127.0.0.xxx] 2023-03-22 13:35
Монголын минь ирээдүй болсон хязгаар нутгын хүүд ийм сайхан боломж олгосон та бүхэнд баярлалаа. Олон олон тэргүүний залуус алс газар эрдэм сурахаар одсон доо.. БАЯРЛАЛАА
Батбаяр [127.0.0.xxx] 2023-03-22 13:34
Монголын минь ирээдүй болсон шилдэг залуусаа өндөр хөгжилтэй оронд төрийн зардалаар сургах болсон энэ үйл явдалд үнэхээр баярлаж байна. Баярлалаа . Саяхан л хөөрхөн хүүг гэрт нь авчирч аав ээжтэйгээ баяраа хуваалцах боломж өгч байсан. сайхан байна аа. Хичнээн их баярласан бол гэж бодон бодон баярлаж байна аа

Бидэнтэй нэгдээрэй