Ойрх Дорнодод АНУ, Израиль, Иран гурван талын зэвсэгт мөргөлдөөн тав дахь өдрөө үргэлжилж байна. Энэ өдрүүдэд олон зуун энгийн иргэд амь үрэгдэж, орон сууц, эмнэлэг зэрэг дэд бүтцэд ноцтой хохирол учирсаар байгаа юм.

Израиль АНУ-тай хамтран Ираны эсрэг агаараар цохилт өгөх ажиллагааг үе шаттайгаар үргэлжлүүлж, пуужин болон байршлын эсрэг довтолгоо хийж байна. Мөн Ираны зарим цэргийн байгууламжуудад цохилт өгсөн тухай мэдээлэл байна.

Дайн эхэлсэн эхний хэд хоногт Иранд олон зуун хүн амь үрэгдсэн бөгөөд тэдний дунд олон хүүхэд ч байгаа талаар хүний эрхийн байгууллагууд мэдээлсэн. Зарим мэдээллээр Израиль болон АНУ‑ын довтолгоонд Ираны эрүүл мэндийн байгууламж, орон сууц, эмнэлэг рүү цохилт өгсөн нь иргэдэд ноцтой хохирол учруулсан байна. Ойрх Дорнодын бусад орнуудад, тухайлбал Ливан болон Персийн булангийн улсуудад зөрчил өргөжиж, орон сууц, худалдаа, зам тээврийн хохирол гарч, хэдэн арван хүн алагдсан тухай мэдээлэл бий. Мөргөлдөөн тасралтгүй үргэлжилж байгаа нь цэргийн болон иргэний хохирлыг нэмэгдүүлж, дүрвэгсдийн тоо өсөх нөхцөл бүрдүүлж байна.

Мөн АНУ-ын цэргийн усан онгоц Ираны хариу үйлдлийн үед устгагдсан гэх мэдээлэл гараад байна. Үүнтэй зэрэгцэн АНУ-ын Сенат АНУ-ын ерөнхийлөгчийн дайн зарлах эрхийг хязгаарлах тогтоолыг буцааж, мөргөлдөөн үргэлжилж болзошгүй нөхцөл бүрдсэн байгаа.

Ойрх Дорнодын нөхцөл байдал дэлхийн эдийн засагт нөлөөлж эхэлсэн бөгөөд нефтийн үнэ өсч, худалдаа, тээвэрлэлтийн саатал үүсч байна.

Олон улсын байгууллагууд нөхцөл байдлыг анхааралтай хянаж, иргэдийг аюулгүй бүс рүү нүүлгэн шилжүүлэх үйл ажиллагаа үргэлжилж байна.