Монгол Улсын Засгийн газар болон Рио Тинто Интернэшнл Холдинг Лимитед, Айвенхоу Майнз Лимитед корпораци, “Айвенхоу Майнз Монголия Инк” ХХК-ийн хооронд байгуулах хөрөнгө оруулалтын гэрээний урьдчилгаа төлбөрийг баталгаажуулахад шаардагдах 287.5 сая хүртэл ам.доллартай тэнцэх Засгийн газрын бонд гаргах шийдвэрийг гаргасан.

Мөн Оюутолгойн орд газрыг ашиглахтай холбогдуулан Монгол Улсын Засгийн газар болон Рио Тинто Интернэшнл Холдинг Лимитед, Айвенхоу Майнз Лимитед корпораци, “Айвенхоу Майнз Монголия Инк” ХХК-ийн хооронд хөрөнгө оруулалтын гэрээ 2009 оны 10 дугаар 6-ны өдөр байгуулагдсанаар Монгол Улсын Засгийн газар болон Айвенхоу Майнз Монголия Инк ХХК-ийн хооронд “Засгийн газрын бонд худалдан авах тухай” гэрээг байгуулсан байдаг. Энэхүү гэрээний дагуу 115 сая ам.долларын нэрлэсэн үнэ бүхий таван жилийн хугацаатай, гурван хувийн хүүтэй Засгийн газрын хямдруулсан үнэт цаас (бэлнээр 100 сая ам.доллар төвлөрсөн)-ыг 2009 оны 10 дугаар сарын 19-ний өдөр арилжаалсан.

Үүний дараахан Оюутолгой ХХК-ийн 66 хувийг Канад Улсын Торонтогийн хөрөнгийн биржид бүртгэлтэй “Туркойс Хилл Ресурс Лимитед” компани эзэмших болсноор Засгийн газрын хямдруулсан үнэт цаасыг эзэмших эрх Туркойс Хилл Ресурс Лимтед компанид шилжсэн.

Тэгвэл өнгөрөгч долоо хоногт буюу 2014 оны аравдугаар сарын 17-ны өдөр Засгийн газрын үнэт цаасны эргэн төлбөрийн хугацаа дууссанаар  Монгол Улсын Засгийн газар үнэт цаасны үндсэн төлбөрийг хуримтлагдсан хүүгийн хамт хөрөнгө оруулагч тал буюу Туркойс Хилл Ресурс Лимитед компанид хугацаанд нь шилжүүлж, олон улсад хөрөнгө оруулагчдын өмнө гэрээгээр хүлээсэн үүргээ биелүүлдэг болохоо баталлаа. Монгол Улсын Засгийн газарт хугацаа хожимдуулсан болон гэрээний аль нэг үүргээ зөрчсөн тохиолдол байхгүй юм.