Улирлыг амжилтаараа тэргүүлэх нь нэгэнт тодорхой болсон “Төв Ургац” энэ удаагийн тоглолтдоо төдийлөн ач холбогдол өгсөнгүй. Тэдний гол тоглогч болох К.Жонес, Режис, Ц.Ганболд, Д.Мөнхтөр сэлгээнд суужээ. Харин эсрэгээрээ "Ирвэсүүд"-д хожил чухал учир үндсэн тоглогчдоо тоглолтын эхнээс л талбайд гаргасан юм.

Улмаар нэгдүгээр үед Т.Санчир тэргүүтэй “Ирвэсүүд”-ийн залуус сайн тоглолтоо үзүүлэн 26:18-аар илүүрхэв. Хоёрдугаар үед “Ирвэсүүд” тэргүүллээ улам баталгаажуулан 12 оноо болголоо. Эхний хагаст Т.Санчир сайн тоглож 17 оноо авсан бол “Төв Ургац”-аас Д.Дэлгэрням, Тамжид нар үүргээ сайн биелүүлсэн. 

Шийдвэрлэх дөрөвдүгээр үед “Ирвэсүүд” Т.Санчирыг суулган Брьювер, Цэвэлдорж, Дорж-Арилд, Эрдэнэдалай, Андерсон гэсэн тавтыг гаргасан нь маш зөв шийдвэр байлаа. Дөрөвдүгээр үеийн эхнээс “Ирвэсүүд”-ийн хамгаалалт төгс, ажиллаж, довтолгоо тун чанартай явж байв.

Улмаар тэд өрсөлдөгчөө 119:89-өөр буулган авч, улирлын 11 дэх хожлоо авлаа. Тус тоглолтод Андерсон 24, Брьювер 21, Т.Санчир 20, Дорж-Арилд 18, Цэвэлдорж 14 оноо тус тус авчээ. Харин “Төв Ургац”-аас Тамжид 19, Жонес 14, Д.Дэлгэрням 11 оноо тус тус авсан юм. “Ирвэсүүд” улирлын сүүлийн тоглолтоо маргааш “Харцага”-тай хийх бол “Төв Ургац”, “Дархан Гарьд”-тай нүүр тулна.