Бөөр орлуулах эмчилгээний нэг төрөл болох гемодиализийн тусламж, үйлчилгээний чанарыг сайжруулах, хүндрэл бэрхшээлийг тодорхойлох, аппарат тоног төхөөрөмж, хүний нөөц, бололцоог судлах, хүлээгдэл, чирэгдлийг бууруулахад чиглэсэн арга хэмжээ авах зорилгоор Эрүүл мэндийн дэд сайдаар ахлуулсан ажлын хэсэг гемодиализийн тусламж, үйлчилгээ үзүүлдэг "Нарт эрдэнэс", "LUX мед", "Интермед", "Агапе", "UB мед", "Эрин", "ICU" хувийн хэвшлийн эрүүл мэндийн байгууллагын үйл ажиллагаатай танилцаж, үйлчлүүлж байгаа ард иргэдийн санал бодлыг сонсож, сонирхсон асуултад нь хариулт өглөө.

Дашрамд сонирхуулахад, улсын хэмжээнд гемодиализийн тусламж, үйлчилгээ үзүүлдэг хувийн хэвшлийн 7 эрүүл мэндийн байгууллагад  34 гемодиализийн аппаратаар эмчилгээ үйлчилгээг үзүүлж байна.

Эрүүл мэндийн дэд сайд Л.Бямбасүрэн энэ үеэр олон улсын стандартад нийцсэн орчин нөхцөл бүрдүүлж, шинэ технологи нэвтрүүлж, үйлчлүүлэгчдийн тав тухтай орчин бүрдүүлэхэд санаачилгатай хандсан хувийн эмнэлгүүдэд талархаж байгаагаа илэрхийллээ. Цаашид төр, хувийн хэвшлийн эмнэлгүүд нэгдсэн зорилготой хамтарч ажиллах нь зүйтэйг уулзалтын төгсгөлд онцоллоо.