IJF буюу Олон улсын жүдо бөхийн холбооны энэ оны хоёр дахь тэмцээн Израилийн нийслэл Тель Авив хотноо Гранд Слам ангиллаар өнгөрсөн долоо хоногт зохион байгуулагдсан. “Токио-2020” олимпын наадмын эрхийн оноо олгох энэхүү тэмцээнд эрэгтэй 248, эмэгтэй 174, нийт 422 жүдоч оролцсон юм. Энэ тэмцээнд манай улсаас ДАШТ-ий алт, хүрэл медальт Сайд Моллай хүч үзэж -81 кг-ын жинд В хэсэгт хуваарилагдаж, эхний тойрогтоо гоц мөргөв. Улмаар хоёрын даваандаа Азербайжаны Зелим Чкаевтай учраа таарч өөрийн дархан өмсөх мэхээр хоёр вазари үнэлгээ авч цэвэр ялсан. Тэрбээр шилдэг наймд үлдэхийн төлөө Европын АШТ-ий хүрэл медальт Италийн Антонио Эспозитог өмсөх мэхээр вазари үнэлгээгээр ялснаар хэсгийн аваргын төлөө шалгаран үлдсэн юм. Ийн В хэсгийн аваргын төлөө тэрбээр Гранд Слам, Гран При тэмцээнүүдийн аварга Германы Доминик Ресселийг вазари үнэлгээгээр ялж, хагас шигшээд өнгөрсөн онд энэхүү тэмцээнийг Гран При байхад түрүүлсэн, “Мастерс”-ын хошой мөнгөн медальт ОХУ-ын Аслан Лаппинаговыг 3:20 минутад цэвэр ялж, Ази-Номхон далайн орнуудын АШТ-ий мөнгөн медальт Узбекистаны Шарофиддин Болтабоевтай аваргын төлөө хүч үзэж мөнгөн медаль хүртлээ.

Ийн тэрбээр дэлхийн чансааны 700 оноо авч, дансаа 3000 ам.доллароор ахиуллаа.

Ташрамд дуулгахад, С.Моллай болон Монгол Улсын шигшээ багийн дараагийн тэмцээн ирэх гуравдугаар сарын 5-7-нд Узбекистаны нийслэл Ташкент хотноо болох Гранд Слам байх юм. Энэ тэмцээнд манай улсаас 22 жүдоч оролцохоор мэдүүлгээ илгээжээ.