Өнөөдөр дөрөвдүгээр сарын 1 буюу инээдмийн баярын өдөр. Бид энэ өдөртэй холбогдуулан уншигч та бүхэндээ чимх ч болов инээд бэлэглэхээр нэг улсын иргэд төдийгүй дэлхий нийтийг хачин, жигтэй худал мэдээндээ үнэмшүүлж чадсан хөгжилтэй тохиолдлуудаас хүргэж байна.

Хамгийн эхний ийм хачирхалтай түүх Их Британийн "Би-Би-Си” агентлагийнхны санаа байсан юм. 1957 оны дөрөвдүгээр сарын 1-ний өдөр "Би-Би-Си" телевиз цаг үеийн мэдээ мэдээллээс хүргэдэг Панорама хөтөлбөртөө Швейцари улсын ард иргэд модноос шпагетти гоймонгийн ургацаа хурааж байгаа тухай мэдээлсэн байна.

Хэдийгээр энэ нь илэрхий наргиа байсан боловч мэдээгээ баримтжуулан шпагетти гоймонг модноос болгоомжтой түүн, наранд хатааж байгаа эмэгтэйчүүдийн дүрсийг тус нэвтрүүлгийн үеэр үзүүлсэн нь олон хүмүүсийг байж боломгүй худал энэ мэдээнд үнэмшихэд хүргэжээ. Тухайн цаг үед Британичуудын олонх нь шпагетти гоймонг буудайн гурилыг устай зуурч хийдэг гэдгийг мэддэггүй байсан юм байна.

Ийм ч учраас дээрх худал мэдээнд итгэсэн үзэгчид нэвтрүүлгийн дараа "Би-Би-Си"-гийн редакцитай холбогдож, ийм шпагеттины мод гэртээ хэрхэн ургуулах талаар зөвлөгөө авахыг хүссэн байна. Олон арван жилийн дараа "Си-Эн-Эн" агентлаг энэ нэвтрүүлгийг “нэр хүндтэй мэдээллийн агентлагийн цацаж, олон түмэнд итгүүлж чадсан хамгийн хөгжилтэй, хамгийн байж боломжгүй худал мэдээ” гэж тодорхойлсон байдаг.