“Санаатайгаар автомашинаар хүн дайраад хэргийн газраас зугтлаа” гэсэн тайлбартай бичлэг өнгөрсөн долоо хоногт цахим орчинд тарсан. Тодруулбал, Дорнод аймгийн Хэрлэн сумын 7 дугаар багийн нутаг дэвсгэр 52А байрны урд талд 2021 оны 07 дугаар сарын 21-ний шөнийн 03:00 цагийн орчимд 19 настай эрэгтэй /дээд сургуулийн 2-р курсийн оюутан/ Д гэгч “Harrier” маркийн тээврийн хэрэгслийг жолоодож иргэн 18 настай эрэгтэй С-г мөргөж биед нь гэмтэл учруулсан, хэргийн газраас зугтсан хэрэг бүртгэгдсэн билээ.

Уг хэргийг Дорнод аймаг дахь Цагдаагийн газар мөрдөн шалгаж байгаа бөгөөд хохирогч “С” Гэмтэл, согог судлалын үндэсний төвд хэвтэн эмчлүүлж байгаа талаар бид өмнө нь мэдээлсэн.

Тэгвэл иргэн С-г машинаар мөргөсөн Д-д Эрүүгийн хуулийн тусгай ангийн 10.1.1-д зааснаар эрүүгийн хэрэг үүсгэн яллагдагчаар татан, цагдан хорих шүүх хурал сая болжээ. Уг шүүх хурлаар Д-д цагдан хорих таслан сэргийлэх арга хэмжээ авсан байна.

Мөн уг хэрэгтэй холбогдуулан тухайн үед зодоон хийсэн 13 хүн (2000-2003 онд төрсөн залуус бөгөөд "эмэгтэй хүүхдээс болж зодолдсон" гэж урьдчилан мэдүүлжээ)-д холбогдуулан Эрүүгийн хуулийн тусгай ангийн 20.16 зааснаар эрүүгийн хэрэг үүсгэж яллагдагчаар татах саналыг Дорнод аймаг дахь цагдаагийн газраас аймгийн прокурорт хүргүүлж, мөрдөн шалгах ажиллагаа явуулж байна.