ОУОХ-ны ивээл дор зохион байгуулагддаг дэлхийн наадам болон тив дэлхийн тэмцээнд амжилттай оролцож медаль хүртсэн тамирчин түүний дасгалжуулагчийг шагнаж урамшуулж мөнгөн шагнал олгодог.

Үүний дагуу өнгөрсөн наймдугаар сард ОХУ-ын Уфа хотод болсон залуучуудын ДАШТ-ий мөнгөн медальт Б.Энхзул, хүрэл медальт М.Мөнхгэрэл болон тэдний дасгалжуулагч Т.Сүхбаатар, П.Чулуунбаатар нарт нэг удаагийн мөнгөн шагнал олгохоор болсныг Монголын чөлөөт бөхийн холбоо мэдээллээ.

Эргэн сануулахад,  тус тэмцээнд Б.Энхзул ЕАШТ-ий хошой хүрэл медальт Польшийн Наталья Валцакыг цэвэр, хагас шигшээд өсвөр үе, залуучуудын ЕАШТ-ий хүрэл медальт Туркийн Зехра Демирханыг 9:4-өөр тус тус ялж, шигшээ барилдаанд “Буэнос Айрес-2018” залуучуудын олимпын наадмын аварга, өсвөр үеийн ДАШТ-ий алт, мөнгөн медальт АНУ-ын Эмили Кинг Шилсонд ялагдсанаар мөнгөн медаль хүртсэн.

Харин М.Мөнхгэрэл 1/8 шигшээд Кыргызстаны Калмира Билимбек Кызыд 4:6-гаар ялагдсан. Түүний өрсөлдөгч шигшээд шалгарснаар дагахад АНУ-ын Пэйтон Строудыг 10:0-ээр ялсан. Дараа нь хүрэл медалийн төлөөх барилдаанд Оросын бөхөд 0:8-аар дийлдэж яваад гайхалтай эргэн ирэлт хийж тоог 9:8 болгон илүү гаргасан төдийгүй өрсөлдөгчөө цэвэр дарж ялалт байгуулсан юм.