"U17" насны Азийн АШТ-ий охидын 69 кг-ын жинд энэ жилийн Өсвөр үе, залуучуудын улсын аварга “Женко” клубын тамирчин Эрдэнэбатын Одзаяа алтан медаль хүртэж Монгол Улсын алтан соёмбот далбаагаа мандуулж, Төрийн дууллаа эгшиглүүллээ. 

Тэрбээр Бишкекийн дэвжээнд хэсэгтээ Узбекистаны Севинчой Полвоноваг 6:1-ээр, Энэтхэгийн Бадана Мансиг 10:0-ээр, хагас шигшээд эзэн орны Кайркул Шаршебаеваг 14:2-оор, алтан медалийн төлөөх барилдаанд Японы Харүка Кобарүг 17:9-өөр тус тус ялсан юм.

Э.Одзаяагийн хувьд ДАШТ-ий нэг мөнгө, гурван хүрэл медальт, гавьяат тамирчин О.Насанбурмаагийн төрсөн эгчийнх нь охин.

Сонирхуулахад, О.Насанбурмаа 2005, 2006 онд өсвөр үеийн Азийн аваргаас алтан медаль хүртэж байсан бол 17 жилийн дараа дүү нь ийнхүү аварга боллоо. 

Ч.НОМИН МӨНГӨН МЕДАЛЬ ХҮРТЭВ

“Бишкек-2022” Азийн аварга шалгаруулах тэмцээний "U17" ангиллын чөлөөт бөхийн охидын 46 кг-ын жинд Өсвөр үеийн улсын хошой аварга, Налайх дүүргийн “Голомт” цогцолбор сургуулийн тамирчин Чинзоригийн Номин мөнгөн медалийн эзэн боллоо.

 

Тэрбээр өчигдөр үдээс өмнө хэсгийн барилдаанд Кыргызстаны Дилназ Абдыкадыроваг 5:2-оор, Узбекистаны Гулья Хажиеваг 2:2-оор, хагас шигшээд Японы Момока Кавамүраг цэвэр ялсан. Тэгвэл алтан медалийн төлөөх барилдаанд Энэтхэгийн Шрутид 4:5-аар ялагдлаа.  

 

Япон улсад төрж өссөн, олимп, дэлхийн олон аваргуудыг бэлтгэн гаргасан “Шигакүкан” ахлах сургуульд сурдаг Б.Халиун хэсгийн барилдаанд Узбекистаны Сакибжамал Эсбосынова, Кыргызстаны Айда Талайбековна Нурудинова, хагас шигшээд Японы Үта Нишиокаг тус бүр 10:0-ээр ялсан. Тэгвэл алтан медалийн төлөөх барилдаанд Энэтхэгийн Реенад 6:10-аар ялагджээ.