Шууд Chart

“Жокер” киноны дараагийн ангид Лэди Гага тоглоно

2022-08-17 15:53:08

“Warner Bros” кино компани 2019 онд нээлтээ хийж, дэлхий дахиныг байлдан дагуулсан “Жокер” киноны 2, 3 дугаар ангийг хийхээр болсон талаар бид өмнө нь мэдээлж байсан.

Жокерын дүрийг бүтээсэн Хоакин Феникс анх “Жокер”-ыг бүрэн хэмжээний кино хэмээн тооцоолж уг дүрийг бүтээсэн аж. Гэсэн хэдий ч тэрбээр дахин Жокерт хувирахад бэлэн гэдгээ илэрхийлсэн. Түүнчлэн найруулагч Тодд Филлипс дараагийн ангиудыг дахин найруулахаар болсон бөгөөд хоёрдугаар анги мюзикл кино байх болно гэж мэдэгджээ.

“A star is born”, “House of Gucci” зэрэг кинонд тоглосон дуучин Лэди Гага Joker: Folie а Deux” киноны Харли Квинний дүрд тоглож магадгүй гэсэн цуу яриа өнгөрсөн 6 дугаар сард дэгдээд байсан юм. Тэгвэл Лэди Гага энэ сарын 5-нд өөрийн твиттерт хаягтаа “Joker: Folie а Deux” киноны 18 секундийн бичлэгийг нийтэлсэн бөгөөд уг бичлэгт Жокер (Хоакин Феникс), Харли (Лэди Гага) нарын бүжиглэж байгааг сүүдрээр дүрсэлжээ.

Сонирхуулахад, “Жокер”  кино дэлхий дахинаас нэг тэрбум давсан ам.долларын ашиг орлого олсон. Мөн “Жокер” олны хүртээл болоход шүүмжлэгчид ар араасаа онц сайн үнэлгээ өгсөн байдаг. Түүнчлэн комиксоос сэдэвлэн хийсэн кинонуудаас “Жокер” хамгийн анх Венецийн олон улсын кино наадмын шилдэг бүтээлийн “Алтан арслан” шагналыг авч, Хоакин Феникс “Оскар”, “Алтан арслан”, “The British Film Academy” зэрэг кино урлагийн хамгийн нэр хүндтэй наадмаас шилдэг эрэгтэй гол дүрийн шагнал хүртсэн билээ.

Нийтэлсэн: Т.Болор-Эрдэнэ

“Жокер” киноны дараагийн ангид Лэди Гага тоглоно  
Үзсэн: 146 Mongolian National Broadcaster  

Анхааруулга:

Та одоогоор сэтгэгдэл үлдээх боломжгүй байна.
MNB.mn сайтын редакц
Утас: 70127055

Бидэнтэй нэгдээрэй