“Amka dance” сургалтын төвийн багш, бүжиг дэглээч, бүжигчин, Э.Амаржаргал хоёр шавийн хамт Герман улсын Берлин хотод зохион байгуулагддаг “Tanzolymp”-ын шигшээ шатанд өрсөлдөхөөр болжээ. Тодруулбал, “Amka dance” сургалтын төвийн багш, соёлын тэргүүний ажилтан Э.Амаржаргал, тус төвийн сурагч С.Номин, П.Номин нар энэ сарын 15-22-нд Герман улсын Берлин хотод зохион байгуулагдах “Tanzolymp” буюу бүжгийн олимпын эхний шатанд цахимаар амжилттай оролцож, шигшээд өрсөлдөх эрхээ авсан байна.

Завхан аймгийн “Amka dance” сургалтын төвийн багш, сурагчдын сүүлд гаргасан амжилтаас дурдахад, “Friends in Moscow” олон улсын хөгжим, бүжгийн зургаадугаар наадам өнгөрсөн оны аравдугаар сарын 14-16-нд ОХУ-ын Москва хотод болж, ОХУ-ын уран бүтээлчдээс гадна Монгол, Болгар улсаас оролцогч оролцсон. Тус наадамд Монгол Улсаа төлөөлөн ардын бүжгийн төрөлд 25-аас дээш насны ангилалд өрсөлдсөн соёлын тэргүүний ажилтан, бүжиг дэглээч, бүжигчин, “Amka dance” сургалтын төвийн багш Э.Амаржаргал тэргүүн байр эзэлсэн.

Мөн Олон улсын бүжгийн нэгдсэн цахим хоёрдугаар уралдаан /IUCDC/ өнгөрсөн арваннэгдүгээр сард дүнгээ гаргахад олон ардын бүжгийн төрөлд Завхан аймгийн “Amka dance” сургалтын төвийн залуу бүжигчин Б.Алтжин болон С.Номин нар алтан медаль, шилдэг үзүүлбэрийн нэгдүгээр байр, “Amka dance” сургалтын төвийн багш Э.Амаржаргал "Бугуйт биелгээ" бүжгээр алтан медаль, шилдэг үзүүлбэрийн дэд байр, мөн бүжигчин Р.Наранцэнгэл "Үлэмж гоо" бүжгээр алтан медаль, шилдэг үзүүлбэрийн гуравдугаар байр хүртсэн билээ.

Түүнчлэн Канад улсад 2022 оны арванхоёрдугаар сарын 30-31-нд цахимаар зохион байгуулсан Олон улсын бүжгийн наадамд “Amka dance” сургалтын төвийн багш Э.Амаржаргал нэгдүгээр байр, Бразил улсад өнгөрсөн сард цахимаар зохион байгуулсан олон улсын бүжгийн наадмын ардын гоцлол бүжгийн бага насны төрөлд Р.Наранцэнгэл нэгдүгээр байр, ардын бүжгийн бага насны хамтлаг бүжгийн төрөлд “Донж-2” хамтлаг тэргүүн байрт оржээ.