Монгол Улсын Засгийн газрын өнгөрсөн долоодугаар сарын 4-ний өдрийн 216 дугаар тогтоолоор “Шүүхийн шийдвэрээр тусгай зөвшөөрөл нь хүчингүй болсон ашигт малтмалын хайгуулын болон ашиглалтын 106 талбайд тусгай зөвшөөрөл олгох сонгон шалгаруулалтын журам”-ыг баталсан. Уг журмын дагуу 37 талбайд  дөрвөн удаагийн сонгон шалгаруулалтыг Уул уурхайн  яамнаас зохион байгуулжээ. Сонгон шалгаруулалтын дүнд 15 талбайд шинээр хайгуулын тусгай зөвшөөрөл олгосон бөгөөд үүнээс 12 талбайд өмнө нь тусгай зөвшөөрөл эзэмшиж байсан аж ахуйн нэгжүүд шалгарсан байна. Харин “Чойдог худаг”, “Могойт”, “Амгалант” гэсэн гурван талбайд огт санал ирүүлээгүй тул Ашигт малтмалын тухай хуулийн 18, 19 дүгээр зүйлд заасны дагуу өргөдлийн журмаар олгох талбайд шилжүүлжээ.