БНХАУ нүүрсний хэрэглээнээс татгалзах, цэвэр эрчим хүчний эх үүсвэртэй болох бодлого барьж байгаа. Энэ хүрээнд Хятад улс 2016 онд нүүрсний импортоо 25 сая тонноор бууруулах зорилт тавьж байна. 

Өөрөөр хэлбэл, гадны нийлүүлэгч орнууд Хятадын том зах зээлийн эрэлтэд нүүрсээ борлуулахын төлөө өрсөлдөж байгаа ийм үед Хятад улс нүүрсний хэрэглээгээ бууруулж байна. Энэ оны эхний 3 улиралд Хятад нүүрсний импортоо 29.8 хувиар бууруулж, 156.36 сая тоннд хүргэсэн байна. Ер нь Хятадын Засгийн газар нүүрсний дотоодын зах зээлээ дэмжих, цэвэр эрчим хүч үйлдвэрлэхэд голлон анхаарч байгаа нь Хятад улс нүүрсний зах зээлийн үнэнч импортлогч гэдэг статусаа алдах нь гэсэн зах зээлийн болгоомжлолыг хоёр дахин нэмэгдүүлжээ.

Хятадын Засгийн газар ойрын хэдэн жилдээ нүүрсний импортоо тодорхой түвшинд бууруулах зорилт тавьж, цаашид нүүрсний хэрэглээнээс бүр мөсөн татгалзах зорилготой байна. Хятад улс 2004 онд дотоодын эрэлт нь дээд цэгтээ хүрснээр нүүрсний импортоо нэмэгдүүлэх хүртэл дэлхийн хамгийн том нүүрс экспортлогч орнуудын нэг байсан юм.

Гэвч сүүлийн жилүүдэд Хятадын хүлэмжийн хий ялгаруулалт дээд цэгтээ хүрч, агаарын бохирдол нь дийлдэхээ больсон учраас цэвэр эрчим хүчний хэрэглээнд шилжих гэж байна. Энэ үүднээс Хятадын эрх баригчид ирэх 5 жилд, жил тутамд цөмийн эрчим хүчний 6-8 цахилгаан станц байгуулж, 2030 он гэхэд цөмийн эрчим хүчний 110 станцтай болох зорилт тавьж байна.